Xas ulamma mechurit Yiwaḍiyen s tqenddyar n leqbayel, ladγa, ṣṣenf iwumi qqaren ‘’Tijiḥlit’’, meεna d tikkelt tamezwarut ara d-tili temlilit yecban ta di temnaṭ-nni. I lmend n waya, ihi, thegga-d tγiwant n Yiwaḍiyen d tiddukla ‘’ Iwaḍiyen’’ tameγra tamezwarut n tqenddurt n leqbayel, ussan n 11-12-13 d 14 deg yunyu 2014. Deg wahil ad naf : timsikent n tekksiwin akked lbiε-nsent, asenzi n yidlisen s ubuddu, isaragen, tameddyazt akked timsizwert anta taqenddurt ara d-yufraren. Ma γef wayen yeεnan tiddin n lecγal, tenna-d yiwet n temḍebbert, Tamsiwt AMMOUCHE Hassina :’’aya, d asurif amezwaru. Timlilit teḍra gar-aneγ kan. Meḥsub d tilawin-agi kan n tama-nneγ.Nebγa ad yettwassen leqdic-a deg unnar-is u ad as-nerr azal i tẓuri am ta. Ma d tikkelt-nniḍen, ad neεreḍ ad d-nenced timawin akk n tmurt.’’ Ma γef ssuma n tqenddurt, yal wa d taxriṭ-is : si 4000 yidinaren alamma d sin n yimelyan.
Hocine .M