S lferḥ d ameqran i teldi tezrigt tis 11 n tmeɣra n lfeṭṭa n At Yanni ass-nni n 7 ɣuct deg wexxam n yilmeẓyen Kaddac Ɛli. Tameɣra n useggas-agi ad tili seg 07 ar 15 ɣuct.Azal tesɛa temlilit-agi yettban-ed deg wawal d-fkan : tagensast n uɣlif n tmerrit d tinḍi, massa Xellut Ayca, d uselway n twilayt n Tizi-Wezzu, imḍebṛen n dayra n At Yanni, anemhal n weḥric n tmerrit d tinḍi, anemhal n tmerrit d unenmahl n yidles mass uld ɛli lhadi. Mass aselway n tɣiwant mass Deɣul Smaɛil, mi d-yenna awal-is, yesterḥab meṛṛa s yinebgawen n lḥerma, yerna yessenmer meṛṛa wid d-yefkan afus n tallelt i tmeɣra agi tis11. Tikelt-agi ad ikkin 87 n yimseknen, ara yilin deg uɣerbaz alemmas Lɛerbi At Ɛmer. Di tezrigt n useggas-nni iɛeddan, llan kan 64 n yiḥeddaden. Gar yiḥeddaden-agi, llan 16 i d-yusan seg twilayin nniḍen am: Tamenɣest, Ɣerdaya, Jijel,… i d-yewwin leqdicat nniḍen am: rqem, aqellal, asaku, tiqnedyar,atg; ara yilin deg waxxam n yilmeẓyen. Aseggas-agi, ad tili tmeɣra-agi s wudem amaynut; acku ad tili temsizelt n usɣun igerzen n At-Yanni.Azal n 110 gar yilmeẓyen d telmeẓyin ara d-yilin i lmend n usuddes n tmeɣra-agi. I teɣzi n ddurt, ad ilin kra n leqdicat d temliliyin deg ullun adelsan “Mulud At Mɛemmer”.
Deḥlal Canez