Tazrigt tis 09 n tfaska tadelsant taεrabt n tefriqt n cḍaḥ aγerfan tesewsaε iẓuran-is, mden almi wwḍen γer temnaḍin yemgaraden n lwilaya n Tizi-Wezzu, ger-asent Iεeẓẓugen, Azeffun d Tigzirt, anda imezdaγ n temnaḍin-agi fursen ussan imuras qesden s waṭas tizeγwa id-yesdurin leqdic adelsan n tfaska-agi. Dγa deg ass wis ssin n tfaska, tazeqa n leqdicat n wexxam n yedles n tγiwant iεeẓẓugen yetabaεen axxam n yedles n Lmulud n At-Mεemmar n Tizi-Wezzu, yesduri-d γef 21H 30 n yiḍ yiwet n tmeγra meqren, anda 03 n trebuεa n cḍaḥ n tmura yemgaraden, ger-asen tamurt n Ṭurk (Turquie), Ččad (Tchad) d tarbaεt Lzzayer id-yussan si twilayat n Mustγanem ( Mostaganem).
Deqs n yemdanen meẓẓi meqqar,argaz tameṭṭut, arrac d tiḥdayin, xarṣum tiwaculin, n temnaḍt n yiεeẓẓugen d temnaḍin niḍen am Buzgan, Iεekkuren, Meqlaε d waṭas niḍen i yellan di tiεad,rruḥen-d ḥedren tagnit ideg temlal tasa d way turew. Tarbeεt n Ččad (Tchad) i yukkan i tikkelt tamenzut di tfaska-agi sebba n cwal i yellan di tmurt-a, d lḥars yegten, tufrar-d s tahri di tfaska-agi, tbegne-d tabγest-is d lebγi-s, anda ihuzzen mera tazeqa s ṣenf n cḍaḥ swayes mucaεen Le ballet IRIFI i yerẓan tilas ger weqbur d watrar, imi tarbaεt-agi d tilemẓit zemren ad-glun s waṭas n umaynut . Ma yella d tarbeεt n Ṭurk (Turquie), d tinebgit n lḥerma di tezrigt-agi tis 09 n tfaska n cḍaḍ aγerfan, d yiwet n tarbaεat id-illulen s lmendad n GOKSEL Arslan deg seggas n 2000 di tama n Kusadas, anda iẓeṭṭen tagmat d tdukli ger yelmeẓyen d yegduden, akken i ttaken afus n tallelt i warac imecṭaḥ i usnarni-nsen deg yaḥricen n yedles d tmetti, akken tteẓẓun asirem d usuref deg ulawen n warac d yegduden n umaḍal. Dγa tarbeεt-agi tewwi deqs n warazen di temzizla tigraγlanin, amedya tufrar-d deg wemḍiq wis ssin di tfaska tagreγlant n cḍaḥ id-hegga tmurt n la Hongrie deg seggas n 2013 . Ma yella d tarbeεt n Lzzayer id-yusan di twilayat n Mustγanem, tezuzen imfarğen s wansayen n cḍaḥ aγarfan aqbur d watrar n temnaḍt-agi.
Imdanen kksen aṭas γef ulawen-nsen, fursen tagnit akken iwata lḥal di tmesbanit-agi tadelsant, anda id-sukksen tiẓuriwin tmura n lbarani. Leqdic d win iεeddan di tegnatin igarzen imi ttawilat akk llan deg wemkan .
Islam Bessaci