Ussan n 20 ed 21 seg wayyur-a n ɣuct ad yili deg Ayt-Smaɛel i tikkelt tamenzut usmel n tdukkliwin (forum des associations), s tikti n uxxam n tɣiwant. Anmazul n uselway n tɣiwant mass Sadeq n Ayt Urbaɛ yettwali deg tegnit-a dakken: « Tidukkliwin d tarekkizt tamezwarut deg usegmi n taddart, imi ilaq ad d-nini dakken leqdic-nsent icudd ɣer uwelleh, aḥesses akked usnerni n tmussniwin ed usegmi n wallaɣ n yimdanen imi amussu sumata ama d adelsan, d anaddal, d inmetti neɣ d asertan, d netta i d-yettakken tagnit i yimdanen iwakken ad snernin tiktiwin d tzemmar-nsen. Amussu daɣen d netta i d allal i yettaǧǧan medden ad zdin timuɣliwin-nsen ɣef yiswan i jerrden. Anect-a yettili-d s umbaddel n taktiwin gar yimdanen deg temliliyin yemxalafen ama d tigrawin neɣ d tiweḥdaniyin ». Tidukkliwin merra d tid i yesnubegten s tumert amaynut-a, acku d ayen ara asent-iserrḥen abrid ad zegrent i uswir wayeḍ n yiqeddicen, anda tuddsa tuqem, ahil n useggas yeɣɣenter, rnu-as aressi n wassaɣ gar-asent d teɣreft. Deg yiwen n waqqa yerna-d win i aɣ-d-yettmeslayen : « Iwakken ad nefk azal i ucuddu gar tdukkliwin akked tmetti ilaq ad yili ubaddel gar yimdanen mebla ma nettu temliliyin yecban ta, ɣas akken mgaradent tmuɣliwin maca iswi d yiwen, imi iswi-ya icudd ɣer waṭas n yiswiren ama d idles, tutlayt, timetti, asnerni d ucuddu n tegmat…atg. Ihi taɣiwant n Ayt Smaɛel imi teẓra belli deg tɣiwant-nneɣ nesɛa yiwen n ugerruj i ur nella ula deg temnaḍin nniḍen, nesɛa aṭas n tdukkliwin i iqeddcen deg wannar, anect-a d ayen yesfraḥen maca yella lexsas deg usdukkel d umbaddal n tmussniwin iwakken ad yennerni uswir-nsent. D anect-a i yewwin taɣiwant ad terr awellih-is ɣer-s, ilmend n waya tessudes-d leqdic-a yellan s wazal-is ɣas akken tagnit tewɛer yerna teḥres. Ur yeshil ula ɣef yiwen ad yefk seg wakud-nnes, ɣas akken tagmat txus yerna llan waṭas n yisergal ama seg tama n udabu neɣ seg tama n tmetti s yiman-is llan yilmeẓiyen i d-yettakken lǧehd ed wakud iwakken ad qedcen deg tdukkliwin-a yemxalafen ». Ma yella d ayen txemmem tɣiwant seg tazwara ed wacu d iswi agejdan yenna-d Sadeq taggara. « Iswi n usmel n tdukkliwin d acuddu ed useḥbiber ɣef tegmat. Asefser n tdukkliwin yellan deg tɣiwant-nneɣ d leqdicat xeddment i yimdanen. Asissen n tdukkliwin ed uncad n yimdanen i yebɣan ad tekkin deg-sent. Array n wazal i tdukkliwin i iqeddcent deg wannar. Akked usnerni n tzemmar n yilmeẓyen iqeddcen deg tdukkliwin-a. D tagnit daɣen i yilemẓiyen iwakken ad banen. Rnu-as, afkay n tegnit i tdukkliwin iwakken ad sbiyynent uguren i sɛant deg wannar ».
M. Xalifi