Akken i d-nenna tikkelt iɛeddan, nuɣal-d ɣef taluft i yerzan asenselkam amarikan akked waddad-is (lḥala-s) amiran. Aneɣmis (information) i yettazzalen taggara-a yeqqar-d dakken Edward Snowden mazal-it deg Trust, maca am umdan n menwala tikkelt-a, meḥsub war aḥuddu azerfan (protection juridique), teḍra-as i umdan-a i yessendhen nnaqus n umihi (danger) am mara yerzu umerray ( touriste) ɣer tmurt-a n Trust. Annect-a yettili-d acku aselway n Trust Vladmir Poutine yugi ad as-d-yernu asduri (asile) asertan i Edward Snowden i yekfan ass n 31 seg yulyu 2014 s tɣara tunsibt, maca daɣen yugi ad t-yefk neɣ ad t-isellem i Temrikt ɣas terwa asuter deg-s akken ad as-t-imudd, ɣef wawalen-is, acku zaɛma yettɛedda ɣef yizerfan n tmurt-is ed tgezzi-s ihi yuklal takurmut, netta ilemẓi asenselkam acemma ur t-iga, ḥaca yesduqqes talsa yerna isellek-d amaḍal merra akken qqarent dɣa tmura. Ladɣa taluft-nni n tɛessast n yisertanen n ddunit sɣur Temrikt acku segmi i d-yettwaberreḥ yisalli-a, iḥulfa Barack Obama ilaq ad iḥerrek, iban-d ihi deg yiwet n tuffɣa anda yessuter asaruf i tmura akk, rnu iɛahed belli tanegga tamarkikant n tɣellist (Nationaly Security Agency) ur tettɛawad ad tɛus idabuyen n tmura. Timura merra ugadent Tamrikt… ḥaca Tarust. Yeggra-d Idward Snowden deg wannu n temseḥsal i yecban wa, acku timura merra uɣur ad d-yili iceyyaɛ tasutert n usduri, ugint ad t-snubegtent acku ugadent Tamrikt deg tidet. Yettusemma ur bɣant ad sɛunt akked-is aɣilif ulama annim n tebrek n yiccer. Yiwet seg-sent d tamurt n Tebrazilt iɣer yenwa tazwara Idward Snawden ad yerzu ma nsenned ɣef wawalen n ubugaṭu-ines. Rnu daɣen Takwaturt, anida i d-yenna zun uselway-is tikkelt yezrin dakken d « Tarust ara iɣetsen ɣef wamek ara xedmen ». War ma nettu Fransa i iffren taqerruyt-is am yifker sdat n umihi, ɣas ma yella rryuy merra n ukuẓ n tɣemmar n ddunit qqaren dakken yewwi-d fell-as tili tga kra i umdan-a ilelli. Ula d ifransisen ddan ed tikti-a. Ad d-nesmekti dakken taggara-a kan aṭas n tpitisyunin ay stenyan i ubaɣur (lfayda) n Edward Snowden, anda suturen deg uselway-nsen François Hollande bac ad yeqbel amdan-a. Amedya n uɣmis L’express. Annect-a rnu ɣer-s belli aṭas n tugniwin tisertanin n tmurt n Fransa ay d-yesbeyynen aḥuddu-nsen i uqeddac aqbur n tnegga tamarikant n tɣellist, yerna sutren ad t-sersen d asaḍ (héros) aɣelnaw. Ma yella taggara-ya maḍi, neẓra daɣen neɣra deg yiwen n wadeg s teglizit, dakken tennulfa-d tpitisyunt tayeḍnin i ineccden tikkelt-a Barack Obama akken ad yeɛfu i Edward Snowden. Adeg-a aliktrunan amarikan yenna dakken Idward d amdan ilelli, i yettḥaraben ɣef tlelli n umdan, ihi yuklal leɛfu ed leqder. Tapitisyunt d tamaynut, bab-is yessutur xersum 100 000 n tuɣac. Tura ad ibin ma yella Idward Snawden ad yeɛfes akal n tmurt-is s uɣsab am wa.
Mhenni Xalifi