Lmeḥna i yerzan aman, n yimezdaɣ n Ayt-Tɛisiwt deg tɣiwant n Ayt Smaɛel mazal-itt tettidir. Ineggura-a tḥettem-iten tmara ad ttun aman n tbernint – i tissit xersum – ed ad ttaɣen yal ass ikilumitren ɣer taliwin bac ad ččaren tiqerɛatin-nsen d asafar n tudert; i yellan d aman. Ad d-nesmekti dakken taqeffalt (château) tagejdant n waman ur d-teggri tesleḥ i tissit maḍi. Deffir mi yuzzel umeslay fell-as, d iseggasen aya tura, dakken tedḥa-d deg lḥala i ur nelli d tazedgant, imezdaɣ stehzan ɣef taluft dɣa fkan aẓuɣɣer. Wid n terza taluft-is ɛerrḍen seg tikkelt ɣer tayeḍ ad t-id-ssirden s waman n javel wissen ahat ad yesfu. Annect-a akk almi d taggara-a kan, iban-d belli acaṭu ziɣen yexmej nezzeh, llan wid i d-yennan dakken ttidiren deg-s ula d iberɛella ed yimqerqar. Dɣa, seg wurrif-nni, tuzzel tɣiwant n Ayt-Smaɛel tceyyaɛ wid ara as-ixedmen tasleḍt. Taggara iban-d ucaṭu yexmej d tidet, rnu yesnuffus neɣ yessukkay seg waṭas n yimeḍqan daɣen. Ihi seg yimir-n, imezdaɣ n Ayt Tɛisiwt ḥacmen aman n tbernint, uɣalen d aḥebber tanzayt tameddit ɣer Tala n Uregrag, ɣef uḍar neɣ s tkerrust, ansi i d-ttagmen aman n tissit. Tikwal mara teččar tala-a, llan ttafen iman-nsen deg tmara ad subben ɣer tinna n Ayt-Mbarek. « D acu akka tettraǧu tɣiwant-nneɣ akken ad tqaɛed tilufa. Nebga ad nettasew seg tbernint n uxxam, mačči alama nuta abrid ɣer tala ». Ay d-tenna yiwet n tmeṭṭut. Aselway n Tidukkla n Krun mass Gemmac Idris, iwala seg tama-s dakken yella-d cwiṭ n usmuẓẓer sɣur tɣiwant-nneɣ, ɣas ma yella iqeddicen ilaq ur ttɛeṭṭilen akken ad seqqfen skud tetedda-d tsemhuyt (saison) n yiɣebbaren. Ma d lmir n Ayt-Smaɛel mass Ɛebdun Nasir yenna-d dakken lecɣal atnan leḥḥun bac ad yefru uɣilif-a n yimezdaɣ.
Mhenni Xalifi