I lmend n tedyanin n 17 deg tuber 1961, yella-d uwali n usaru ajdid ‘’Faḍma n Sumer’’ n Belkacem Hadjadj di tzeqqa n tmeγriwin n uxxam n yidles Lmulud At Mεemmer n temdint n Tizi Ouzou. Asaru am wa, i waken yeffeγ-d, mačči dayen isehlen : laqen-as ttawilat imeqqranen d yimdanen yessnen s telqayt sinima d umezruy, ama n tmurt neγ d iberraniyen. Γef wanect-a, dγa, i d-yemmeslay Mass Belkacem Hadjadj di taggara n usεeddi n usaru. ‘’Leqdic –a, yeṭṭef-aneγ 4 n yiseggasen n lxedma. Nessexdem ttawilat imeqqranen iwulmen. Nebγa ad d-nexdem ayen igerrzen. ’’Ula d tin yuraren Faḍma n Sumer mačči d taqbaylit. Γef wanect-a, yenna-d :’’xedmeγ acḥal n tikal casting ur d-ufiγ ara ayen ttnadiγ ; ulac tin i yi-iqenεen di tmurt daymi nudaγ ula di Fransa. Dinn-a mlaleγ d Laêtitia Eido. Xas ulamma ur tessin ara taqbaylit meεna yettak cbih γer udem n Faḍma n Sumer γef wacu ttnadiγ. Syin yesselmed-as Benmohamed tameslayt.’’
Aṭas, di&gamma,; i iwalan d akken asaru-agi ur d-yemmeslay ara s telqayt γef umecwar n Faḍma n Sumer ayen yeğğan Mass Hadjadj ad d-yini : mačči di snat n tsaεtin ara d-nini amecwar-is akken yella, wagi d yiwen n usaru γef Faḍma n Sumer mačči d asaru n Faḍma n Sumer.’’
Taqsiṭ n usaru teḍra di taggara n yiseggasen n 1940 di tmurt n Leqbayel ur nelli ara di lweqt-nni ddaw leḥkem n umnekcam, acu kan yella d amekkan i uheggi n tegrawla. Di liḥala yecban ta i d-tekker Faḍma n Sumer deg yiwet n twacult yeγran leqran. Faḍma n Sumer teffeγ di lqaleb-nni n leεwayed yurzen tameṭṭut, syin, dγa, i yebda umecwar-is…
Asaru dayen igerrzen nezzeh, εlaḥsab n wid akk i t-iwalan. ‘’Akka tura, nezmer ad d-nini nesεa sinima di tmurt-nneγ. Asaru am wa wa ad yekk di yal timsizzelt di ddunit.’’ I aγ-d-yenna yiwen.
Hocine.M