Amaɛḍur deg tudert-is n yal ass yettmagar-d sin n wuguren: yiwen d win n waṭṭan-is s timmad-is, wis-sin d win n yiberdan n tmurt-is. Deg berra, anda ma yerra umaɛḍur ulac aɣerbaz neɣ d tanegga (agence) neɣ d taska (antenne), neɣ d tadbelt (administration), neɣ d asečču (restaurant), neɣ d axxam n tẓuri (am yimaṭṭafen, axxam n yidles, win n umezgun), i ixemmemen fell-as ad as-d-gen amkan send ad ttwabnun. Dima d taɛkemt i as-d-rennun ma yebɣa ad d-yeqḍu ccɣel seg walbaɛḍ n yimeḍqan neɣ yenwa ad yezdi iman-is i wiyaḍ deg tudert n berra. Uguren-a ladɣa s tseddarin (escaliers), iɣeẓran, imedwan, akked yiberdan ur nemmug (non entretenus) i nutni. Ula d tizeɣwin n yimejjayen yewɛer aṭas lḥal fell-asen iwakken ad awḍen ɣur-sent ad gen tirzi (visite). Imḍebbren n tmurt-a ur ten-id-mmektayen ara akken i d-yewwi lḥal ad as-tiniḍ tamurt n Lezzayer ur tesɛa d amaɛḍur. Amek seg tama tadrimt tella, tettruḥu deg yal asenfar, ma yella d ttawil i umaɛḍur deg yiberdan, deg temdint, akked yimeḍqan sanda irezzu ulac ad d-yili? Deg tmura tiberraniyin, amaɛḍur yettḥulfu s timanit (autonomie) tagaɛmirt mara yezger amnar n uxxam-is akken ad d-yeg kra, acku i wanda yebɣa iruḥ llan yiberdan ttwaqaɛden bedemma i tkalict-is neɣ i ukursi-is yettḥerriken. Ula deg tedbelt neɣ deg uxxam n tkebbanit, ma ur yelli wamek ad yefru ccɣel-is seg uqaɛ (rez-de-chaussée) yella umsali (ascenseur) ara t-yeddmen alama d aswir i yenwa. Acimi ihi imasayen-nneɣ (responsables) ur ttekkaren ad gen akken xersum deg yixxamen i inecced s waṭas umaɛḍur, am tdeblin, tikebbaniyin, rradyuyat…atg. Acku, ma newwi-d amedya n Texzant Taɣelnawt n Ṭṭmana Tinmettit (CNAS) n Xerraṭa, amek seg tama tesnubgut s waṭas imdanen-a i tent-yuɣen deg tfekka-nsen, seg tama ula d anekcum-is (entrée) yuɛer ula ɣef win iteddan s yikessulen, aniɛad ɣef win yettkalayen ɣef tkalict. Mi yettwabna uxxam-nni ilaq tili ssemsawan aswir n unekcum akked win n ubrid n baylek skud sdat-s i tella dɣa. Rnu ɣer-s, ayen yesḥissifen ugar amek almi taxxamt anda sɛaddayen asefqed (akuntrul) i yimuḍan-a tezga-d deg uswir anji (1er étage) mačči deg unedda-yen? Lḥasul, ixxamen i ur nefka azal i umaɛḍur caḍen, ɣef waya yessefk s teɣseb ad yettwaɛiwed leḥsab ed tmuɣli i tceqquft-a n medden ifeclen, anda ara asen-yemmag ttawil deg tal tibnit (construction).
Imesdurar ttḥeyyiren ugar
Tudert n yimaɛḍar n temdint akked wid n udrar ur tsawa ara. Imi, akken yebɣu yili, amaɛḍur n waɣir teshel-as tuffɣa akkin, imi sdat n uxxam-is i yella ubrid, ma yella d amaɛḍur n udrar, deg yimi n tewwurt n tnezduɣt-is ad yaf aɣilif amezwar, i yellan, aha d taksart d aḥecrarruf, neɣ d tasawent mm laɛtab. Yettusemma d taɛkemt taẓayant ama ɣef wid i t-yettawin neɣ ɣef-s s timmad-is. ɣef waya, yewwi-d ɣef yixxamen n tɣiwanin s yiwet, ad ttarran kra n tedrimt i tama swayes ara xedmen iberdan i yimaɛḍar-a bac ad asen-ssisehlen tuffɣa ɣer yibilajen. Ur d ayen yelhan ma yeḍḥa-d umaɛḍur d ameḥqur ula deg taddart-is, ed sɣur wid-is.
Mhenni Xalifi