Annar n tẓuri n teqbaylit, am netta am wid nniḍen, ijerred ismawen n wid iqedcen deg-s s wul-nsen, wid yerẓan asalu ɣer tezlitt d uẓawan lak d wudmawen-nniḍen n weḥric-agi. Ger inaẓuren-agi nezmer ad d-nebder, kra ger watas i yettwassnen s leqdic-nsen, s tebɣest s wayes id d-ekren ad d-inin ayen ttḥulfun deg tmetti ur nelli ara d tin yettaken tamuɣli igerzen i tẓuri sumata, ladɣa ma seg yimi n tmettut. Hnifa yerẓan asalu ɣer tezlitt s wayes id d-enna ayen tettḥulfu, ayen tt-iqerḥen d wayen yak tettwali deg tmetti, ayen wiyyiḍ zemren kan ad t-id-inin s tsusmi nettat tennat-id s usefru, s leǧher akken yak imdanen as-slen, akken daɣen ad ẓren ayen umu tesber tmettut taqbaylit. Deffir-es ḍefren-t-ett-id tlawin-nniḍen am Zohra yugin tazaglutt n tmetti. Taneggarut-agi, ula d nettat, xas akken tudert ur s-tefki ara atas n lweqt akken ad d-efk ak ayen umu tezmer, tessaweḍ ad d-eǧ yiwen n ugerruj s wazal-is. Zohra tekker-ed deg yiwet n twacult taqbaylit deg useggas 1962 di taddart Agemmun yettabaɛen Larbɛa Nat Yiraten. Am nettat am tlawin yak n leqbayel n tallit-is, Zohra telqeḍ azemmur, texdem iqwiren, tezḍa icettiḍen d ibernyas. Uqbel ad teddu d tislit, kullec itedduy-as akken teddun waman. Iɣeblan bdan-as-d deg mi tezweǧ tikkelt tamezwarut, akken mazal-itt d tacawrart. Zwaǧ -is ur idumm ara atas. Tebra-d terna tewwi-d yides yiwet n teqrurt. Tezweǧ tikkelt tis snat. Maca ula d abrid-a ur terkid ara atas. Tufa-d iman-is tikkelt-nniḍen deg uxxam-nsen s teqrurt tis snat. Deg useggas n 1982, Zohra tessufeɣ-ed tasfift-is tamenzut. Tenna-d deg-s ayen tettidir tmettut, ayen umu tsebber d wayen s yettruzen ifadden. Tasfift d tin yelḥan atas. Ger izwal n tezlatin tecna, tid s ways tettwassen, ad d-nebder: “Zerɛeɣ ur mgireɣ ara», “Targmeḍ -iyi melba sebba», “As-ed», “Yefna-k sber ay ul-iw», “A taleb aru-iyi lḥerz», “Eyya-d ad k-eẓreɣ»,” Ayen ak urǧaɣ ifut», “A lward yefsan», “A yemma ad beddeɣ ɣer taq»,…D izwal d yettaken tikti ɣef wayen tettedir tmettut taqbaylit: asirem, ddel, sber,…Seg 1986, Zofra terza ɣer Fransa anda tcennu ar almi d asmi temmut di yennayer 1995 ɣef laɛmer n 32 iseggasen.
Fatiha.K