Am akken i d-yedda yakan uneɣmis (information) deg Uɣmis n Yimaziɣen, iseɣrez (album) amaynut n Zedek Mulud, ad yili deg ulzuz (ssuq) ass n 22 seg duǧembre n useggas-a. Ad d-nawi ladɣa deg umagrad-a ugar n ttfasil ɣef umaynut n unaẓur, iqeddicen i t-yettraǧun, akked kra n tlufa nniḍen.
13 n tezlatin s yisental imaynuten yemgerraden.
Am akken i aɣ-yesnum, neẓra dɣa seg tura dakken aḍebsi amaynut n Zedek Mulud « Asderfef » ad yili d tamuqint n yisefra i d-yettakken abeḥri i wallaɣ. «Ad ilint deg yiseɣrez-a 13 n tezlatin i ssarameɣ ad hwunt i uzayez ed win i yi-iḥemmlen. Ayen s zemreɣ ad ak-d-zwireɣ, dakken yettawi-d fell-anaɣ, daɣen ɣef waṭas n tlufa, gar-asent tadyant-nni n ɣuct, amecwar-iw n ccna, tajmilt i tgejdit n Dda Sliman i yellan gar imezwura i inejren abrid n tezlit tamḥaddit, mačči kan tazwawt, ula tazzayrit. Deg walbum aṭas n yisental ara tafem kunwi». Akka i aɣ-d-yenna Zedek Mulud send ad d-yernu ɣef wadeg-nni i as-imuggen i Dda Sliman deg Pari s tsutert n Tidukkla «Ameslay». «Cerheɣ mliḥ ɣef tejmilt-nni i as-xedmen ɣas ur lliɣ dinna (acku yella deg tmurt. Tn). Mi ara yili unaẓur am Dda Sliman, i d-yefkan daɣen anect-nni i tezlit tazwawt, niḥqa yuklal annuz».
Ɣef taluft-nni n usiẓreg n yiman-is…
Nella nura-d yakan deg yisebtar-a ɣef wugur i d-yemlal Zedek Mulud deg usiẓreg, almi ur d-yelli umsegzi akked yimaẓragen, skud yella yetturaǧu uḍebsi i 20 n ɣuct yezrin. Dɣa ɣef waya, skud bab n tezlit «Aderwic» ur yebɣa ad iɛeṭṭel, yefren ad d-yesnulfu tiẓrigin ad yessiẓreg iman-is. «Teẓram akk dakken anaẓur yettwaḥqer deg tmurt, mazal ur as-fkan aẓayer-is. Nekk tura mi d-snulfaɣ tiẓrigin, tazwara terra-yi tmara akken i asent-semmiɣ dɣa. Tis-snat, atan yewwi-yi wagna ɣer termit d tamaynut. Acku ur teddiz ur tebriz dakken d nekk ara yessiẓragen iman-iw dima». Nwala deg win i aɣ-d-yettmeslayen asirem-nni dakken taẓuri ad as-yettwar wazal am wakken ccetkan dɣa aṭas n yinaẓuren yakan ɣef waya, am Lewnis Ayt Mengellat ed Crif ḥamani.
Ad yili taggara n wayyur-a deg tamenɣest.
Neḥsa belli ula ilindi, Zedek Mulud yella yettwaɛreḍ i tfaska n ccna amaziɣ deg unẓul n uneẓruf. Maca ur iruḥ ara acku yella-d uɣilif deg unafag (aéroport) imir-nni. Tikkelt-a, yetturaǧu ihi ad yili Zedek Mulud deg Tmenɣest ass n 24 seg duǧember 2014 ilmend n tfaska-ya, yettusemma sin n wussan kan segmi ara d-yeffeɣ umaynut-is. Ma yella syin d tasawent, deg useggas amaynu, ad yili mmi-s n At Xelfun deg Pari i tegnit n yizli ilmend n yennayer.
Mhenni Xalifi