Am wakken ira wallus, yal mara ad yekfu yal akraḍyur (trimestre) n useggas n tɣuri, yal aɣerbaz ad yeg tagrawt n uɣerbaz (conseil de classe). D timlilit, anda ara ilin iselmaden merra, anemhal, akked yiɛessasen ladɣa bac ad mmeslayen ɣef waqqayen igejdanen i d-ibanen deg teɣzi n kraḍ n wayyuren: ma yella kra deg wacu xussen yinelmaden ed tneɣriyin, ma tufrar-d taluft i yuklalen ameslay, ma isubb-d neɣ yuli uswir n warrac…atg. Deg waya ihi, iga uɣerbaz alemmas n Tizwal am tal tikkelt, ayen swayes teffeɣ tegrawt-nni n wid iqeddcen din, ur temgerrad aṭas ɣef yiseggasen yezrin skud ur d-yelli umaynut, akken i aɣ-d-yenna yiwen n uselmad deg uɣerbaz. D acu kan, ameslay yella isenned s waṭas ɣef waddad n usɣur (établissement) seg tama n wallalen, ayen akk merra i t-ixussen, ladɣa aɣilif n waman ed kra n wallalen n daxel. Maca daɣen, yella uneɣmis i yuklalen ad d-yebder yiwen, d tufrart n kra n yinelmaden iɛeddan tmenṭac ttelḥamen ɣer ttseɛṭac deg tlemmast-nsen n ukraḍyur-a amenzu. Amaynut i d-ibanen daɣen aseggas-a deg uɣerbaz alemmas n Tizwal, yerza tiferrawin n yigemmaḍ n warrac. Imi deg wayaqeddac tamhelt n uɣerbaz tettak-iten i warrac send imuras, ma d tura tuɣal tefren ad ten-tefk i yibabaten n warrac ɣef ilaq ad rzun i uɣerbac akken ad ḥsun s tlemmast n tarwa-nsen. Yelha ma nenna-d belli tikti-ya, tɛeṭṭel d aɛeṭṭel ur tettwassemres deg yiseggasen iɛeddan.
Mhenni Xalifi