Acḥal tura segmi i d-teffɣen isebtar n tmaziɣt deg yiɣmisen i asen-yefkan amḍiq ɣas kra n wussan deg ddurt, maca ar tura iɣmisen-a ur d-ttawaḍen ara ɣer tɣiwant-a n Ayt Smaɛel, tin i d-ibanen n yidles ed tmussni. Yal yiwen amek iɛerreḍ ad yessegzu taluft, ama seg wid mu ur yehwi waddad-a neɣ seg wid i ur tuqiɛ akk, yettusemma zzant neɣ rɣant d yiwet-nsent. Ɣef waya, nesteqsa amzenzu n yiɣmisen, i yellan ala netta deg taddart, ɣef tmentilt n wanect-n, acimi ur yettaf ara usmaɛlan tagnit ad yaɣ aɣmis yuran s tutlayt-is deg temnaḍt-is war ma isubb alama d Lberǧ n Mira i isaḥen deg tɣiwant n Tsexriwt. Ihi, ayen swayes i aɣ-d-yerra win nesteqsa d awal-a: « lliɣ ttawiɣ-d yiwen iseggasen iɛeddan maca ur yettnuzu ara, yettɣima akken i d-yusa, ɣef waya sḥebseɣ-it ». Deg taluft-a ur iban anwa ara nesseḍlem, ma ɛni ulac annim-a imeɣriyen deg Ayt Smaɛel neɣ d iɣmisen nniḍen i ten-yerḥan, neɣ d wid yesɛan tinedlisin skud ur gran deg ddhen-nsen asiweḍ n yiɣmisen i yiɣermanen n tɣiwant, ɣas ma, akken i d-nniɣ tazwara, ur d wid yeṭṭuqten. Maca, akken yebɣu yili, lemmer ay nwan yinedlisen n temnaḍt ad ssawaḍen ula sin i wass, wiss ɛni ur ttilin ara sin-nni ara ad ten-irefden neɣ ad ten-ireffden ?
Nuḥen s tuget yiɣmisen n teɛrabt
Mi nerra tamawt i yiɣmisen i d-yettrusun i walmend n yimeɣri asmaɛlan nufa dakken ṭṭuqten s waṭas wid yuran s teɛrabt, rnu, akken i d-iban waddad, d wid-nni daɣen i ileḥḥun ugar n wiyaḍ. Ahat tamentilt n wanect-a d aswir amatu n tɣuri ɣur yilemẓiyen i yettidiren deg Ayt Smaɛel. Deg waya ur ḍlimen ara, imi d aɣerbaz-nsen yeɛyan i ur asen-yesselmed tazwara tutlayt-nsen tayemmat, i ur nessaweḍ daɣen ad ten-id-yesker sɛan tizemmar ed yidles n tira ed tɣuri n tutlayin tiyemmatin. « Akken ad ɣreɣ aɣmis n tmaziɣt ilaq-iyi ad subbeɣ ɣer Lberǧ n Mira s 40 n yidnaren rrwaḥ ed tuɣalin. Rnu, tikwal ɣas akkenni, ttafeɣ-iten fukken. A win yufan ad nesɛu wid i ten-yeznuzun da ɣur-neɣ ». Aya yenna-aɣ-id yiwen n umezdaɣ n Ayt Smaɛel.
Mhenni Xalifi