I lmend n yennayer, nebγa ad nẓer anda tedda tmaziγt deg unnar, nebγa ad nesteqsi γef umecwar-is seg 1980 ar ass-a. Ihi, neqsed Ben Mohamed akked Allaoua Rabehi, wid-nni teεna srid temsalt n tmaziγt : amezwaru d amedyaz, wayeḍ d aselmad. S lferḥ d ameqqran i aγ-d-rran γef yisteqsiyen-nneγ. Nesteqsa daɣen Akli Kaci, d amaswaḍ seg wid yettnaḍḥen deg wannar n uselmed
Ben Mohamed (d amedyaz) Anda tedda tmaziγt seg 1980 a ass-a ?
Nezmer ad d-nini, axir zik i as-fkan yimdanen azal, ay kkaten kter fell-as axater segmi i as-tefka dduwla ciṭ lḥeqq i tmaziγt, nwan yimdanen dayen, ur ilaq ara ad xedmen fell-as. Bran i ṭṭbel deg waman. Tagi d tamezwarut.
Tis snat,u ayagi zgiγ qqaraγ-t : tiyemmatin ur heddrent ara i warraw-nsent s tmaziγt, ama s teqbaylit, ama s tcawit neγ tameslayt-nniḍen. Meḥsub s tmaziγt s umata.
Tis tlata, d lakul. Ur ṣseḥfaḍen ara timussniwin yelhan, ur sγaren ara amezruy n tmurt akken yella. Lakul, ur d-yessufuγ ara amdan yeṭṭfen di laṣel-is.
D acu twalaḍ deg tmaziγt tutlayt taγelnawt tuniṣibt ?
Ma yella wacu ara d-yernun, mreḥba yis-s. Acu kan mačči d tagi i d tifrat. Imdanen ilaq ad qedcen deg yal aḥric, tira, aselmed, anadi, amezgun d usnulfu…Mačči d lqanun weḥd-s i izemren ad yesnerni annar-agi n tmaziγt. D nekni s warraw-is.
Yesteqsa-t Hocine.M