Akken i d-nnant aṭas n tamiwin deg umaḍal send ad d-yekcem useggas-a amaynut n 2015, dakken wid yettkeyyifen ur ferrḥen ara aṭas kra n wussan mara d-yekcem yennayer, acku ssuma n ubaki n girru ad yali ɣur bu ṭṭwabel n dexxan. Seg tama, ahat anect-a ad yesbeɛzeq tadamsa n walbaɛḍ, maca d tagnit ad t-yeǧǧ yiwen, ɣas ma yella ulac win ur neẓri dakken tiǧǧit n dexxan neɣ n girru ɣur ukeyyaf yennumen gar wayen akk i as-iweɛren aṭas deg ddunit-is. Wanag, nwala wid yettɛewwilen ad ǧǧen girru, ssawaḍen ɣer yiswi, s tallelt n teɣtest (décision) akked tebɣest (courage). Dɣa, mi ara yeṭṭixxer seg usummu n ujeɣbub-nni, nezmer ad d-nini iga-d taɣawsa tgerrez mliḥ i tdawsa-yis akked texriḍt-is. Imi girru, akken ẓran medden, yekkat tazwara idmaren n umdan akken ilaq, agaz-nni i ijeɣɣer umdan ixenneq i yiburaf, yettḍurru aṭas mačči drus turin. Daɣen, iban belli girru yettḍurru tawennaḍt seg tama-s. Yesɛa nnuba ulama d tameẓyant deg usluɣ n nnfu (air), igenni, akked twennaḍt s umata, ladɣa ma neḥsa belli ugar n umelyar n yikeyyafen i yellan deg umaḍal. Anect-a, rnu-yas daɣen, dakken girru yesnulfuy-d iɣilifen deg tmetti, anda yessefk ad yili umqader n wayeḍ. Maca, deg waya, girru yettaǧǧa bab-is iteffeɣ i wallaɣ, yettaǧǧa taɣzint (raison), mi ara yettkeyyif – seg wakken yecdeh dexxan-nni – deg yidigan anda ur d-yewwi ara akk ad yessiɣ akaɣeḍ-nni yettwakeblen, am sbiṭar, afurgu, akked deg kra n temliliyin i d-yessegrawayen aṭas n yimdanen gar yimuḍan ed yisḥaḥ.
Mhenni Xalifi