Yenna ucennay di tezlit Imesdurar : ‘’Tullas-nsen am tsekrin, Leqraya, nnif, sser d zzin, D timesdurar. Deg uzemmur neγ di tsedawit, Neγ s lfuḍat deg tmeγriwin, D timesdurar…
Akka ay d tameṭṭut taqbaylit. Akka ay nebγa ad tili. D acu kan deg unnar yettban-d, tikwal, wayen-nniḍen xas ma qqaren ulac tirect ur nesεi akerfa. Taqbaylit si zik d azamul n nnif, d agerruj n tmussni : d nutenti i yessehbibiren γef yidles d ttrebga ; d ajgu alemmas. Ass-a n wussan, wiss ma mazal anect-a?
Ass n 8 deg meγres n yal aseggas d ass agraγlan n umennuγ n tmeṭṭut, meεna γur-neγ yal aseggas icuf gma-s. Ass-nni, d ass n uḥewwes n tmeṭṭut. ‘’Ad d-kkreγ sbeḥ, ad d-ṣṣubeγ γer Tizi Uzzu. Ad ğğeγ arraw-iw i urgaz-iw. D ass-iw, ad xedmeγ akken i yi-yehwa. Ad nadiγ anda tella tmeγra yelhan d icennayen ḥemmle&gamma,; ad ruḥeγ ad kkseγ lxiq. Tameddit, ad afeγ argaz-iw ihegga-d imensi. Ha-t-an 8 deg meγres γur-i.’’ i aγ-d-tenna Massa Laribi d tasegbart (actrice). Acu kan ayen iwumi ur tfaq ara, ahat, Massa Laribi d akken terra akk ussan n useggas d 8 deg meγres imi tetturar deg yisura s teqbaylit. Am wakken neẓra, tameslayt n tyemmat d azref agejdan n tmeṭṭut. Aṭas n tlawin, di&gamma,; ur nḥemmel ara ass n 8 deg meγres, ladγa tid-nni yeγran. Qqarent-d yuγal wass n umennuγ d ass n tannumi : cḍeḥ d uḥewwes.
Akken yebγu yili, aṭas n tdukliwin i iqeddcen deg uḥric yeεnan tameṭṭut, ama dayen i d-icudden γer yizerfan neγ γer tmetti. Deg unnar-agi, dγa, ara naf Massa Hachemi nettat s yisem-is d taselwayt n tiddukla ‘’Femme Active’’ n Tizi Uzzu i d-iheggan yiwen wahil γef demma n waya deg waggur-agi n meγres. Γef wanect-a, tenna-aγ-d : ‘’nekni ur neqqim ara kan ar ass-a i wakken ad nhuc kra n tmuγliwin isebken. Neẓra tameṭṭut tesεa amḍiq d ameqqran di tmetti. Ihi, s leqdic-nneγ nettaεraḍ amek ara as-nili di lmendad imi tezmer ad d-tefk afus i lebni n tmetti. Si zik tameṭṭut taqbaylit fell-as i yebna uxxam, ama si tama n ttrebga, ama si tama n temεict. Si zik tessisiγ-d talqimt n twacult-is. Γef wanect-a i nebγa ad tt-nesdekwal, ad d-terr ddehn-is γer waṭas n temsal. Iswi-a, nebγa ad t-naweḍ s ttawilat n temliliyin i d-nettheggi yal tikelt u di yal amekkan. Nettheggi-d isaragen akked timsikniyin. Ur nqebbel ara ad tili tmeṭṭut d allal kan deg uxxam.’’
Ihi, tameγra tameggazt d wafud igerrzen s teqbaylit.
Hocine.M