ɛedda waggur tura segmi qqimen warrac mebla leqraya s sebba n usunded n yiselmaden. Agur deg yal teṣebḥit tiḥdayin d warrac i ten-yettawin ɣer uɣerbaz i ten-id-yettaren melba almud. Ageffur, aṣemmiḍ , aḍu iɛedda fell-asen, aya melba ma neseḥseb tadrimt ttṣerifen deg ifurguten i ten-yeṣṣawaḍen, i ten-id-yettaran s amdiq. Aggur s lekmal-is, tanekra-nsen ɣef setta neɣ ɛad uqbel ɣef izedɣen tuddrin ibeɛden ɣef tasnawit akked uɣerbaz alemmas i wakken mi ara wwḍen s amkan ad afen tiwwura medlent, iselmaden ččḥen.
Aya iḍeru zdat n wallen n yimawlan n yinelmaden-agi. Iḍeru zdat n wallen n tneɣlaft n ttrebga , zdat wallen n tiduklwin n yimawlen n yinelmaden. Meɛna xas akka yal yiwen yeẓra yerna iwela , truḥ am akken ḥedd ur d-yecqi deg ayen akka ttidiren warraw-nneɣ nefka d asfel i useḥseb anṣaf n yiselmaden si tama akked win n tmuḥaqranit n udabu si tama nniḍen. Anta akka tamurt deg yettdum usendad n yiselmaden ugar n waggur ? Anta akkka tamurt deg adabu ur iferu ara tamselt yecban tagi deg yiwen waas neɣ sin? Anect-a d ayen ur iqbel leɛqel am akken i ɣ-t-id-yenna yiwen uɣerman yečča wul-is. Ayen yerzan teneɣlaft n leqraya d amek ara d-illin ikayaḍen n ukradyur –agi wis sin i teddun ɣer taggara-s. Amzun akken yella wacu ɣran inelmaden deg ussan-a yezrin ! Amur ameqran seg-sen, ttun tikarniyin-nsen, ttun idlisen-nsen , ḍeqren-ten akkin amzun wwin ussan n usgunfu. Yerna xas ma yella uɣalen yinelmaden( deg ussan-a) ɣer leqraya  ,; amek ara yilli lḥal-nsen imi di tilwat ṭelqa n ulmud dayen tendaq di ttneṣfa. Ilaq ad zrin wussan akken asen-id-yuɣal wul ɣer leqraya. Meɛna anwa yenḥarwan deg anect-a? Xuḍi tizelgi n ulmud di tmurt-agi mačči n wassa-tt!
Aɣbel-nneɣ deg aḍris-agi mačči akken a nesḍlem wa neɣ wihin, acku yeqqar wanzi “ wa meɛḍur wayeḍ d lheqq-is.” Aɣbel-nneɣ i wakken kan ad neger tuttra-agi : “ anda akka ddan imewlan n yinelmaden? Ayen ttun lwajeb-nsen mgal dderya-nsen?” Kra seg-sen sneɛmilen tt-ceyyiɛen arraw-nsen akken ad ɣran deg ussan n usgnufu deg yigarajen s yedrimen lqider deg ara nnaɣen akken ad raṣṣin di tmurt lakul izemren ad ileqem tamusni n tidet deg allaɣen n yinelmaden-neɣ melba ma rnan taẓayet n tɣuri-agi n ukamel ( cours suplémentaires) amek aken …. D anect-a ahat i yeǧǧan kra n yiselmaden stehzayen deg uɣerbaz akken ad jmɛan aṭas n yinelmaden ɣer temsirin ttmuddun( berra n uɣerbaz ) s tedrimt … akken qqaren tjra telha ula deg aɛrur n igujilen , awid akn ad tili tadrimt-ik xas s uznezi n yeblaḍen . Maca taluft teleqay, lehlak-is d lehlak n tmeti s umata. Timeti anda grarben ifridisen n yiseɣ, ǧǧan nnuba i yir aserwet akked d yir tikli. Am akken is-yenna Zdek Mouloud deg usefru-ines
Yiwen akken i d-yuki
Igiru n lqehwa
Ccuruq yeldi
Ziɣemma yeɣra
Acenfir yulli
S uqeluẓ n ccemma
Ɣer deffir yezzi
Yessusef di lqaɛa
Yiwen a yettbipi
Ur as d terra-ara
…
Yiwen a yettleɣwi
Yefɣed si ttberna
Yiwen ibeɣlleli
Txuṣ ẓẓeṭla
Yiwen qenduri
Tezla ɣer lǧama
Wayeḍ derɣali
Ɣer ljamiɛa
Nekni a nettwali
Ur d nneni kra!
Aït Slimane Hamid