Ɣas ma seg useggas-a ad yili d aselway aqbur n tesqamut n yineẓẓurfa n tfaska n Udrar n Fad skud yefka taselwit i mass Zahir Meksem, maca isefra akk ɛeddan-d sɣur-s. Dɣa, ɣas ma yekkes-aɣ-tt wakud, yerra-yaɣ-d Ɛellawa Rabḥi, aselmad n tmaziɣt deg tesdawit n Bgayet, ɣef yisteqsiyen-a mi i d-nemlal deg uxxam n yilemẓiyen n Ayt Smaɛel.
Ma tzemreḍ ad aγ-d-tefkeḍ tamuγli-inek γef tfaska n tmedyezt n useggas-a (2015) ?
Tamuγli-inu deg tfaska n tmedyezt aseggas-a, d tamuγli n usefru, d tamuγli n usirem. D tafaska tis mraw-d-kraḍet, ur tunif i ubrid i d-tenjer seg tazwara. Am wakken i tuγ tanumi, tewwi-d yiwen n wahil d anesbaγur, yeččur yerna ila azal meqqren : amyezwer n tmedyezt, isaragen, tameγra n ccna i d-gan sin n yicennayen d imeγnasen imeqqranen : Malika Domrane akked Ouazib Mohand-Ameziane. Seg yimedyazen i d-yusan aseggas-a, aṭas d ilemẓiyen d tlemẓiyin, yerna simmal yettali uswir n usuefru : wid yewwin arrazen n tfaska (amezwaru, wis sin, wis kraḍ), d ilemẓiyen akk. Γas akken abrid γezzif, yessawen, γas ggten wuguren, γas drusen wallalen, tizi-ya n tfaska teskan-d dakken simmal, simmal nettaẓ γer sdat, nger asurif d ameqqran deg ubrid-nneγ s iswi.
Tamuγli-inek γef tmedyezt ?
Deg tfaska-ya, nniγ-d aṭas n yilemẓiyen d tlemẓiyin i d-yusan, yerna d ilemẓiyen i yewwin arrazen n tfaska. Anamek n waya, yettnerni usefru, yettimγur, teddem-it tsuta n tura, tesnerna-t, tger-as amaynut, ama deg wayen yerzan isental d tektiwin, ama deg taγult n talγa n usefru d tugniwin (tinγumnayin). Anamek n waya, deg tizi-ya, yennerna ugraw n yimedyazen, yennerna ugraw n wid yessebdaden tutlayt, tger tutlayt-nneγ asurif γer sdat.
Yessesten-it: Mhenni Xalifi