Hattan tlul-d tfaska tamaynut n tmedyezt tamaziɣt deg Tubiret. Iwakken tutlayt ad tezgi tettnerni seg wakud ɣer wayeḍ, iwakken ad sbeyynen tarwa-s timmeɣnest deg wannar, Tidukkla Aqeddic n Yilemẓiyen ed Tmerrit n waɣir n Tubiret teggar tiɣri i kra n wid ed tid yesqerdicen awal n tyemmat – amaziɣ- iwakken ma bɣan ad tekkin deg tfaska-nsen n tmedyezt deg teẓrigt-is tamezwarut, ad d-aznen sin n yisefra-nsen d imaynuten ɣer yiznil-a alikṭrunan: tafaska2015@gmail.com . « Nwala ala deg tubiret i ulac tafaska n tmedyezt tamaziɣt, dɣa nenna-yas acuɣer ala ur d-nesnulfay ara yiwet, meqqar d abaɣur nniḍen i yidles-nneɣ ». Akka i aɣ-d-yenna Ben Ɛisu Nasir, yiwen n uɛeggal n tidukkla-ya tameẓyant i d-yennulfan deg useggas n 2010. Ad d-nerr kan awellih ma yella win yesran i wugar n yisallen, yezmer ad yessiwel i wuṭṭun-a n usawal: 07 70 43 87 95. « Nessaram kan imedyazen ad d-aznen isefra i yuran ttbinen-d akken ilaq. Zemren ad ttekkin seg yal tawilayt n tmurt acku tafaska d taɣelnawt. Ma d taẓrigt-a tamenzut ad tili d tajmilt i unaẓur Ɛli Meẓyan i yuklalen aṭas n leqder sɣur yal yiwen seg-neɣ ». I aɣ-d-yerna win i aɣ-d-yettmeslayen.
Yewwi-d ad ẓren yimedyazen i yenwan ad ceyyɛen isefra-nsen bac ad ḥeḍren i ttiɛad-a n at wawal, dakken azemz aneggaru n uceyyaɛ d ass n 25 seg yunyu i d-iteddun. Isefra-nni dɣa, am tal tikkelt deg yella umsiẓwer, ad ɛeddin sɣur tesqamut n yinezzurfa. Ma yella d tafaska ad temmag ussan n 26, 27, 28, 29, 30 seg wayyur n yulyu, yettusemma d teɣzi n lqidar bac ad tili d timlilit twennaɛ.
Akka ihi, yetturaǧu, yuɣ lḥal, ad maggen warmuden n tfaska-ya deg uxxam n yidles n Tubiret Ɛli Zeɛmum anda ara yecnu taggara yinebgi n yiseɣ Ɛli Meẓyan, maca ar tura ur teddiz ɣef umḍiq-nni. Afud igerrzen i tdukkla-ya, d tekti n lɛali i d-yellan, imi awal azwaw, amaziɣ yesra i urfad, yuḥwaǧ aqdac sɣur wid-is.
Mhenni Xalifi