Tanṭelt n Ahcène Taleb

Partager

Ass-nni lǧemɛa 05 deg yunyu 2015 i yemḍel umeɣnas ameqqran n tmaziɣt akked tugdut Mass Ahcène Taleb deg taddart-is Ait Abdelmoumene i d-yezgan deg tɣiwant n yiwaḍiyen.

Ḥeḍren aṭas n yimeddukal-is, ladɣa wid ukud i d-yewwi amecwar n umennuɣ seg yiseggasen-nni 1980 ar ass-a n wussan : imeddukal i yellan deg umussu adelsan amaziɣ (MCB) yecban, Said Sadi, Said Khellil, Mouloud d Hamid Lounaouci, Yidir Ahmed Zayed, Ali Yahia Abdennour, Dr Ounoughene, Med Loukad, Said Boukhari d wiyaḍ.

 Tafekka n Ahcène Taleb, tella tettel s wannay amaziɣ seg-mi i t-id-wwin seg Fransa anda i yemmut ass-nni n 31 deg maggu 2015, mebɛed mi i d-yeɣli lehlak fell-as ugar n sin n yiseggasen-agi.

Ilul Mass taleb ass n 18 deg yennayer 1955 deg Wat Abdelmoumene. Deg useggas n 1983, yebda yesselmad  deg tesdawit n Tizi Uzzu. Ittekki akk deg leqdicat n umussu adelsan amaziɣ armi yuɣal uxxam-is deg taddart d tizrigin i tesɣunt ‘’Tafsut’’ mebɛed mi llant tmezwura ɣer Hend Sadi. Deg tsertit, yella yeqqreb deg tektiwin ɣer ukabar n FFS. Deg yiseggasen n 1990, yunag ɣer Fransa anda yeqqim netta akked twacult-is.

Yenna-d Mass Lounaouci : taggara-a, nettemlili kan gar-aneɣ mi ara yenqes yiwen seg-neɣ.

Ma d Djouher. Z,  tanelmadt n tmaziɣt deg tesdawit n Tizi uzzu tenna-d : xas d mmi-s n taddart-iw, meɛna ur ẓriɣ ara azal-is  armi walaɣ anect-a n yimdanen i d-yusan ɣur-s. D irgazen am wigi i yeṣṣawḍen  tamaziɣt ɣer tesdawit.    

Hocine.M  

Partager