Asmi akken ulac di tqelmunt-nsen , qeṭṭun-d di tḥanut n winna –akken tura jeɛlen d ulac. Mačči d izli i ḥamlen immir ad ḥnunnefen ɣer wemkan anda yettɣimi. Tezla d uqlaqal ɣer din s lmeqṣuḍ imi ayen ɣef acu ttnadin ḥala ayen ara d-aɛwin si lǧiha-s. Qeṭṭun s ukridi. Netta ur d yecliɛ ara , yettmmuddu mebla cceḥa, acku ṭṭbiɛa aken i taga. Yettbuddu medden , werǧin iɣull yiwen seg cwiṭ-nni akken yesɛa deg ikufan-is. Gar-as d yiman-is yeqqar kan : “ awi-d ad afen medden acu ara wwin ad nefɛen iman-nsen yerna ad nefɛan wiyaḍ. I wumi ara jemɛeɣ yak ayen kesbeɣ dag-i kan i yiman-iw? ”. Taḥanut-is mezziyet mačči d kra . Tella deg-s llamba tettreqqriq akken tefk tafat s lqis-kan. Fiḥel zzyada n ṭṭya ,acku yeẓra yezdeɣ deg taddart anda qqwan iderɣalen i umi ula id tegga tafat. Ma d-sin-nni , lferḥ-nsen mi ara d yelli zdat-sen azmam-nni deg yura timussniwin ines . Din id squccuḍen , yal-ass, ayen s w-acu ara seḥmun wallaɣ-nsen ɣef yeqfel uqerrif n war tamussni. Maca, xas akken wwin, ayen akken wwin ran-t d-ayla. D Nutni it-id nawlen. Anda ddan medden wehmen seg isefra akked timucuha id ttawin. Si ssuq ɣef ssuq, si tejmaɛt ɣer tajmaɛt , zzuzren awalen id wwin deg tiktabin ɣṛan ɣer bab n tḥanut-nni armi yuɣal lqum ala yisen i yettgalla. Yebda yettali itri-nsen ( neɣ ahat nwan dayen yuli) deg igenni. S-ya d s-ya la sen -id sawalen ama ɣer timeɣriwin, neɣ ɣer lewziɛat, neɣ tebyitat akken ad cebḥen teswiɛt. Yiwen seg-sen ( gar sin-nni) yefhem ula d netta yezmer ad yaru yerna ad yesnnulfu. Inuda ɣef lecyax ara s yeslamden kra n ilugan n tira, immir yeddem leqlam yebda asmiri deg awalen ɣef tiwriqin. Da d-taqenuẓt, da d-asefru, dihin d lexwaṭer. Werdin yufa ziɣ seddu awal ad yarew awal. Yenna i yiman-is : “ih tura nekk zemreɣ , yeɛfa Ṛebbi fell-i, uma sriɣ i tirzi ɣer bab n tḥanut-nni!” Ma d wis sin-nni yeɣwa-t cḍeḥ, yuɣal d-aferraḥ i teddu i zedwa n iḍebbalen. Maca mazal i teddu d umezwaru-nni,. Yiwwas kan m-safhamen yenna win-a i wayeḍ ; “ tura nekk ad qqareɣ , ma kečč sefru. A nuɣal d tayuga, lwaḥid ad nejmeɛ ṣṣaba mačči d kra!” Zrin wussan, ttun yak win ɣef akken id qeṭṭun asmi akken di tqelmunt-nsen yezdeɣ w-ulac. Ttun ayen i sen-yettales, ttun ayen ɛebban fell-as.Anda ddan qqaren-as “ Ah win-a? Anef-as kan anef-as, mazal-it d nniyya. Xas aɣ yeṭṭef lḥwaj ɣer ɣuṛ-s akka ɣer zdat , yeshel a t-id n-serḍeb… yelha kan w-aya…i tuẓga…” Bab n tḥanut-nni , ɣef ur yexfi kra , yettwali s w-allen amek tizikert tebɣa a tt-ɛaned tamrart. Ihuz tuyat-is yenna: » cwiṭ a nɛeddi fell-as a win yebɣan deg-s yimɣur/ ma d aṭas ur nettaǧǧa amer win i teddun meɣṛur”
Yefka amrar, yessawzel lemrar… acku deg ul-is yeẓra yewɛer i umdan umi i tt-tekkes lekyasa ad yecbu ales!
Aït Slimane Hamid