Anadi deg uḥric n tsekla taqbaylit s imal yettnerni deg yiseggasen-agi ineggura, ladɣa, ɣer yinelmaden n tesdawit. Akka, dɣa, ara naf uletma-tneɣ Drifa Fahem i yettarun deg Uɣmis n yimaziɣen s yisem D.Said Lhadj, telha-d s unadi ɣef tsekla taqbaylit deg yiwen ukatay n Master i d-qeddem deg tesdawit n Tubiret s lmendad n Mass N.Bellal.
Akatay-agi, yewwi asentel : ‘’Ticṛaḍ n timawit deg tullisin tiqbayliyin. Amedya : ‘’Tuɣalin’’ n Ɛmer Mezdad’’. Anadi deg uḥric-agi d ayen ixussen aṭas daymi i yesɛa azal meqqren leqdic am wagi. Akatay-agi, yewwi-d awal ɣef wamek i yesseqdac Ɛmer Mezdad tasekla timawit deg tira-s. Ama d timucuha, inzan neɣ tumgist. I wakken ad tesselqay tnelmadt anadi-ines, teɛreḍ ad d-terr ɣef usteqsi agejdan i tefka deg tazwara : ‘’amek i d-ttbanent tecraḍ n timawit deg wamud n tullisin ‘’Tuɣalin’’ n Ɛmer Mezdad? Amek i d-yettili useqdec-nsent ɣer umyaru-a?
yebḍa umahil ɣef sin n yiḥricen igejdanen: aḥric amezwaru, llan deg-s sin n yixfawen. Deg yixef amezwaru tebder-d tnelmadt kra n yiferdisen n teẓri (timiḍranin tigejdanin). Deg yixef wis sin, temmeslay-d ɣef usissen n wamud n umyaru.
Deg uḥric wis sin, tella-d deg-s tesleḍt.
Deg taggara n umahil-a, tufa-d d akken amyaru yesseqdac tiwsatin yellan deg timawit d tiɣbula. Acu kan mačči s lekmal i yettuɣal ɣur-sent. Tiɣbula uɣur yettuɣal Ɛmer Mezdad, sɛant azal, tawuri akked uẓayer deg tmetti taqbaylit. Amedya: amusnaw, amedyaz akked ccix…atg. Tufa-d d akken amyaru yesseqdac aṭas tawsit n yinzan deg tullisin-a ‘’Tuɣalin’’. Maca aseqdec n tewsit-a, yettili-d s kra n talɣiwin. Yella anda i d-yewwi umyaru inzan-nni deg timawit akken llan , yexdem-asen kan akarif. Am wakken llan, daɣen, yinzan i d-yesseɣwel: ibeddel-asen deg umawal neɣ deg talɣa; llan yinzan i d-yesnulfa netta s timmad-is.
Yuɣal umyaru ɣer kra n yizamulen n tgemmi n yidles n teqbaylit. Amedya: aseqdec n ’’uẓetṭa’’, ‘’ikufan’’d’’lfeṭṭa’’.
Akka, ɣef wakken i d-tenna tnelmadt, s useqdec-a, yebɣa ad yessiḥbiber umyaru ɣef tgemmi n teqbaylit, am wakken, daɣen, yebɣa ad tt-yerr gar tigemmiyin tigraɣlaniyin.
Leqdic am wagi, ɣef wakken i d-tenna tesqamut n uktazal, yezmer ad yili d amedya i yinelmaden, ladɣa wid-nni ara ikecmen deg uḥric n unadi. Ma d uletma-tneɣ Drifa Fahem, ha-tt-an, teggmen ad tkemmel deg unadi-ines am uxḍib-is, ameddakel-nneɣ Hakim, i yettheggi akka tura duktura-s. Afud igerrzen i sin yidwen.
Hocine.M