Deg waggur yezrin , xedmen yinelmaden n uɣerbaz alemmas Malek Qadum n Uqbu yiwet n tufɣa tusnant ɣer tuddar n Lmecta d At sellam i d-yezgan deg tɣiwant n Yiɣrem, tama n Uqbu , Deg taddart n At Sellam, mlalen yinelmaden, deg tejmaεt, akked yimɣaren. Mmeslayen-as-d ɣef laεwayed, tajmaεt d wazal-nsen deg tuddsa n tmetti taqbaylit. Akka, dɣa, i tettunefk tegnit i teqcicin ad qqiment i tikkelt tamezwarut deg tejmaɛt. Mebɛed mi i slan yinelmaden i kra n yiwillihen yeɛnan tudert sɣur imɣaren, ṭṭfen abrid-nsen ɣer taddart n Lmecta anda i sersen, deg tazwara, tameqqunt n yiseǧǧigen deg tmeqqbert d asteḥem ɣef 74 n yimeɣrasen n taddart-agi. Mi kecmen taddart n Lmecta, ufan yiwen n ugraw n temɣarin yettraǧu-ten dinna. Wwint-d tlawin-agi awal ɣef ttawilat n lebni d yimɣan n usejji i yellan deg tama-agi n tmurt n leqbayel. Am wakken i d-wwint awal, diɣ, ɣef usewwi n kra n yisufar yecban, ameqful, tarnast, abazin…atg. Deg taggara n tirza, yenna-d Mass Brahim Benhamouche : ‘’tamaziɣt, ha-tt-an deg unnar, deg berra ɣer yimɣaren akked temɣarin. Tamaziɣt d leɛwayed, d leqder, d aseḥbiber ɣef ugama mačči kan d tajerrumt.’’
Hocine.M