Tura akken nettwali, yettimɣur umaḍal n tira-nneɣ, seg useggas i wayeḍ simmal ččarayent temkariḍiwin, ttnernayen-d yizwal d imaynuten deg tal tawsit n tsekla. Aya d ayen igerrzen s waṭas, d ayen i d-yesbeyyinen dakken amaru yeṭṭef abrid-is srid ɣer tansa i yessen. D ayen i d-yettawin daɣen aneɣmis (information) amaynut, i d-yeqqaren atan tutlayt n Lmulud At Mɛemmer tettceɛcic, tettfeǧǧiǧ. Maca ugur mačči da, deg tama nniḍen seg wansi werǧin yella-d ucettki; tin n yimeɣri. Ih, ugur tura yekka-d sɣur yimeɣri, ma d acettki iban ɣur wanwa i as-nsell; ɣur umaru.
Anda-tt twizi-nni i ubaɣur n tutlayt?
Segmi inuḥ umaḍal uhlis n internet, ddeqs n yimeɣriyen imekdiyen i ttuɣ ɣɣaren ayen i d-yennulfan deg ukaɣeḍ, i uɣalen ɣer tɣuri n yidlisen deg teẓrigt taliktrunant am PDF, war ma ḥezzben i ugemmuḍ ara d-yekken seg tannumi tamaynut. D ayen dɣa i yettaǧǧan kra n tektabt tamaynut i d-yeffɣen tettɣima kan i takka, tettwanas udur deg tnedlisin deg teɣzi n yiseggasen.
Zemrent tdukkliwin ad gent kra.
Segmi i d-yennulfa uɣilif-a i yesdbedben tikli deg ulzuz n tfarest (production) taseklant, tuɣal taluft, am ɣas ini yettunefk-as uẓuɣɣer, skud ula d kra n tdukkliwin, neɣ ddeqs seg-sent, tidelsanin yerna, ttwalint deg ubeddel yettḍurrun war ma gant-d kra umi zemrent. Skud iban belli win yettwalin deg ugur n iga kra, iɛemmed i wayen yellan, lemmer seg tikkelt ɣer tayeḍ, deg ttiɛadat akk i d-yettilin, ttaɣent-d kra n yidlisen sɣur umaru-ya neɣ d wa akken ad ten-zuzzren i wiyaḍ, tili yettnerni cwiṭ usirem n umeskar, ur yettenqas. Tili tettwaẓẓa tzerraɛt n tmussni deg wabbaɣ n yal ilemzi. Ladɣa mara yili wayen i d-yettwagamen yura s tutlayt tayemmat: tazwawt. «Ugur-a mačči kan ɣur-neɣ i yella, ɣas ma ahat nekkni nesɛa-t d ameqqran, wiyaḍ d ameẓyan. Maca d tidet, lemmer tidukkliwin ad xemment, ma dɣa iɛeggalen-nsent d imeɣnasen n tidet, zemrent ad fsint ulama cwiṭ acuddu». I aɣ-d-yenna yiwen n uselmad n tmaziɣt.
Mhenni Xalifi