Azemmur aseggas-agi ad yili s waṭaṣ deg tama-agi n Ṣummam, acku akken i neẓra deg wayen din n tzemrin, azemmur yeṭuqet! Ama deg Tazmalt, Buǧlil, Aqbu, Sidi Ɛic lakked d tɣiwanin nniḍen, azemmur yelha, « yaḥla », yagi ur tewwit ara tabaɛuct nni iwumi qaren « izi n-uzemmur » (la mouche d’oliγe). Aseggas-agi daqes n tzemrin i menɛen seg waṭan-agi n twaɣit, yessefsaden lɣella dayen kan! Uk, ibabaten n tzemrin zemren ad luqḍen azemmur yelhan, mači am win n-useggas n 2013 yeččuren ttiwikiwin n yizan n-uzemmur! Deg tama nniḍen, ageffur yewten ussan-a iɛeddan yesseǧhed aṭaṣ tizemrin, yerna i uzmmur deg tezmart, lḥeb-is yuf akken ilaq. Nezmer ad-enini belli aleqqaḍ n-uzemmur ad yelhu mliḥ tikkelt-agi, d-acu kan, tiwaculin ad heggin-t iɣallen-nsen-t ɣef ayagi. Lemɛinṣrat, si tama-nsen-t, ur tɛeṭilen-t ara ad ẓunẓun-t, imi dayen kan d lawan nsen-t! Qrib kan ad d-tuɣalen wussan-nni n-uzemmur, i ḥemlen medden. Iḥerqan ad aččaren d-imelqaḍen, ama d-imɣaren, d timɣarin nneɣ d yilmeẓyen akken ad luqḍen « uraɣ-agi », yes i ɛacen imezwura nneɣ. Zzit d-asafar i ssaxdamen leqbayel s waṭaṣ deg tuččiyin nsen, acku, nnig waya, zzit mači kan d-učči, maca d dwa i myal aṭan! Ussan-a yebda uznuz n-uzemmur deg taddart n Aftis, i d-yezgan deg tɣiwant n Buǧlil. Azemmur yettenuzu s kra kan, imi mazal ur ɛad leqḍen medden. Tebda ssuma-s s 40 idinaren i lkilu. D-acu kan, azal-agi yezmer ad yali deg smanat id iteddun. Ma d zzit, akka tura yettnuzu seg 600 ɣer 700 idinaren i litra. Aṭaṣ n twaculin dagi deg tama n Ṣummam traǧun-t ad yeww uzemmur akken ad luqḍen-t. Am akken d-agur n lɛid!
Syphax Y.