Am waɣiren merra n tmurt, aṭas n tdukkliwin i d-yennulfan deg Bgayet deg yiseggasen ineggura ; d ayen i mu nessawal amussu asduklan (mouvement associatif). Tal tidukkla amek tqeddec, tal yiwet deg wanwa aḥric i tefren ad d-tbin. Skanayent-d dɣa iqeddicen igerrzen, daha ed dihin, deg teɣzi n useggas, i ubaɣur n yimdanen s umata. Seg tdukkliwin-a aṭas i yellan, ɣas mačči kifkif i ttḥerrikent; imi llant ttxussunt deg wallalen, tiyaḍ deg tedrimt, tiyaḍ deg ufus, tiyaḍ nniḍen deg lebɣi idumen.
Ma nemmeslay-d kan akka ɣef kra n tdukkliwin i d-ibanen xilla aseggas-a deg wannar-a n leqdic alsan (humanitaire), neɣ xersum i neẓra nekni, war ma nga leḥsab alqayan. Yettusemma neẓra ad ilint tidak i nettu. Ad d-nini kan tga ayen igerrzen Tdukkla n Ugezdu n Tujjya n Tesdawit n Bgayet (AFMB) s teɣlamt tasnujjyant i txeddem i tɣiwanin, akked tigawin nniḍen i txeddem i yimuḍan. Tidukkla i Yimeɛḍar ed Yimuḍan Idumen «Tiɣri», tga ula d nettat daɣen ddeqs n warmuden ar tura segmi d-tennulfa deg tlemmast n useggas-a. Iɛeggalen-is d wid ixedmen ccɣel yelhan ama deg tɣiwant n Ayt Smaɛel neɣ berra-yis. Tidukkla n Yimuḍan n Tgeltemt (DEFI) n Tezmalt tɛerreḍ daɣen ad d-terr yella wayen ur nelli, i lfayda n wid mu yekkes waṭṭan tikli. Am tirzi n tukksa ɣef lxaṭer i Uweqqas, i yettwassudsen deg unebdu yezrin.
Tidukkliwin i iqeddcen ɣef yimuḍan n uqerruy, aṭas daɣen i yettazzalen da ed din, snulfuyent-asen-d kra n tegnatin n ucmummeḥ, am DEFI n Uweqqas, Tidukkla n yimuḍan n uqerruy n Bgayet, akked tin «Taɣect n Ugrud», ed tiyaḍ…
Amḍan-a i d-nebder d kra seg-sent kan, wamma neẓra caḍent tdukkliwin i yettarran ddhen-nsent i wid ixussen ed wid yuḍnen. Ad yessirem kan umdan ad idum waya!
M. X.