La nluqqeḍ azemmuṛ.
D abeṛkan yibwa.
Akal ɛzizen.
Tizemṛin n baba.
La nluq-ḍ azemmuṛ.
Di cetwa i usemmiḍ.
La nṛuḥ-d ass-a
D-iṭij neɣ lahwa.
Kemini a weltma.
Tamedyazt uzekka.
La nluq-ḍ azemmuṛ.
Ad yeddu yifeṛ. «
Akka i cnan-t tisukṛin n taṛbaɛt n « Djurdjura » deg yiwet geṛ tezlatin nsen-t, yeqqimen deg umezṛuy n cna Amaziɣ. Akka ihi, alqaḍ n-uzemmuṛ yebda ussan-a deg tama n Ṣumam. Imelqaḍen uɣalen-d ɣeṛ yiḥeṛqan nsen yeččuṛen d tizemṛin, akken ad ǧemɛen lɣella. Icellafen, imaxtafen, tigelzimin, tiqfacin, icwaṛiyen, iɣyal,… uɣalen-d akk ɣeṛ wannaṛ n welqaḍ. Imelqaḍen tezzin ɣef tzemṛin am izuṛaṛ ɣef yiduṛaṛ. Uṛ tṛuḥu-n ɣeṛ tzemmuṛt nniḍen alama kfan alqaḍ. Llan kṛa n yimdanen ttṛaǧun tallit-agi n-uzemmuṛ am wagguṛ n lɛid, acku ḥemlen ad luqḍen. Degs lfayda muqṛen i tezmaṛt n yimelqaḍen: d-« addal » akked zzit i d-ṛebḥen ɣeṛ taggaṛa. D-acu kan, yesɛa laɛtab… Ihi, ussan-a, ulac taddaṛt anda uṛ leqḍen aṛa medden. Azemmuṛ yewwa, awid tuṛa iɣallen aken ad leqḍen! Aseggas-agi, ɛla ḥsab akken i nwala deg waṭaṣ n yiḥeṛqan deg tama-agi n Ṣumam, tizemṛin uṛun-t dayen kan, alaṛmi « celxen-t » tciṭa! Ad yili zzit s lkutṛa. D-acu kan, yella yiwen waɣbel: xuṣṣen iɣallen i ulqaḍ n-uzemmuṛ. Agnu-agi yettuɣal-d myal aseggas, imi ulac aṭaṣ n yimelqaḍen. Medden ulamek, d-ixeddamen, neɣ qqaṛen deg yiɣṛbazen. Aṭaṣ n twaculin deg lǧiha-agi n Ṣumam ttṛaǧun-t imuṛas n tagṛest (γacances d’hiγer) akken ad luqḍen-t tizemṛin-nsen-t, imi aṛṛaw nsen-t ad ṛnu-n afud i welqaḍ. Deg tama nniḍen, lemɛinṣṛat ẓẓunẓan-t, ussan-agi, deg luḍa n Ṣumam. Aṭaṣ degsen-t bdan-t tuẓḍa n-uzemmuṛ. Annaṛen anda ttṛusun-t tiṛac n-uzemmuṛ bdan ttaččaṛen. Sya ɣeṛ kṛa n wussan, lemɛinṣṛat-agi, ad xedmen-t ass d yiḍ akken ad qeḍɛen-t (ahat xaṭi) ṭuẓḍa n-uzemmuṛ. Lawan-agi, daɣen, it faṛaṣen kṛa n yilmeẓyen akken ad ǧemɛen aṭaṣ n tedṛimt, imi deg lecḍuḍ n webṛid aɣelnaw wis 26, wigi znuzun azemmuṛ. S lmizan ilikṭṛuni, ilmeẓyen-agi weznen azemmuṛ i ttaɣen akken at zenzen. Ɣef ayagi, deg kṛa n wussan kan, ssuma n-uzemmuṛ azegzaw yebdan s 40 idinaṛen i lkilu, deg wagguṛ n-unbiṛ yezṛin, tewweḍ ɣeṛ 65 idinaṛen i lkilu tuṛa! Yeṛna, mazal ahat ssuma-agi atteṛnu nnig waya. « Tezmeṛ ssuma-agi at ɛeddi i 100 idinaṛen i lkilu » ɛla ḥsab tamuɣli n waṭaṣ n yimdanen ! « Ih, zik-nni, ulac win i d-yennan azemmuṛ a d-yas wass ad yetnuzu. Ass-a, dayen i ḍeṛṛu-n » akka i d-yenna yiwen wemɣaṛ i laḥqen tallit-nni n zik! Akka i d-« amuṛ » a ddin uqeṛdac !
Syphax