Amenzu n yennayer 2016, d ass umezruy n tmurt n Lezzayer d tmurt leqbayel, imi nnig n 02 imelyunen n yemdanen id-yussan si temnaḍin yemgaraden n tmurt n Lzzayer( Batna, Xencella, wahran, Σennaba, Tamenraset…atg) d tmura n lbarani Lmaruk, Fransa, Tunes, rzan-d s waṭas γer taddert n At-Ḥmed di Σin Lḥemmam lwilaya n Tizi-Wezzu akken ad-cebbḥen tamdelt n ugrawliw Ḥussin n At-Ḥmed. Imdanen yellan di tesirt n ccix, amḍiq ideg teḍlaq tfekka n ugrewliw Si Lḥussin fuden tilelli n wawal, fuden tagrewla, tṣuγun, cennun icewiqen yezzuzunen ul, icewiqen id-yettaken tabγest i umennuγ γef tugdut n tmurt, d tijmilin i si lḥussin γef ubrid id-yenjar. Talwit d tin id-yaγlin s waṭas ama di taddert n At-Ḥmed akked ibardan merra yessekcamen γer-s, imi yuγ lḥal γef teγzi n ddurt-aya yella d aheggi, anda iγallen laman d usellek ṭuqten s ljahd. Ddesqs n wudmawen n tsartit d tẓuri i yellan deg ttiεad n temḍelt n si Lḥussin, ger-asen aselway amenzu n tmurt mass Σebdelmalek sellal iwmi ugin yemdanen xarṣum ilmeẓyen ad d-yekcem, dγa dayen i t-idegren ad-yuγal. Maca udmawen niḍen ḥedren merra, am uneγlaf n ddin Muḥamed Σissa, Mulud Ḥemruc, Karim Ṭabu, Σli ben flis , Nasser Buḍyaf, Lewnis At Mengellat, Σli belḥağ, Mqari, ğab ellah d wiyaḍ. Maca wid icebḥen tamḍelt n si Lḥussin d izmawen n wedrar, d ilmeẓyen leqbayel, irgazen tilawin bden s tebγest akken ad-snarnin di ccan n baba-tsen, gmat-sen, amdakkel-nsen Ḥussin At-ḥmed id-yewwin amennuγ γef teγzi n 70 iseggasen. Mbaεd taẓallit n lğumuεa, tella-d tẓallit γef lmarḥum Ḥussin At-Ḥmed di tessirt n ccix, syen wwint γer taddert-is At-Ḥmed i ibaεden azal n 2 ikilumetren. Akken yeweḍ γer lemqam n Ccix Muḥend Ulḥussin, amḍiq ideg ara yettwemḍel Si lḥussin γer uẓekka n yemma-s, lγaci naγlen-d am uweṭṭuf, bγan merra ad-nnalen nεac, bγan merra ad-wallin tamdelt n si Lḥussin s lqarb i tikkelt tanegarut, bessif it-id-sarsen iγallen usellek di ṭumubil id-yewwin tafeka. Azal n yiwet n tsaεet d amdeggar d wamek iṣawḍen meḍlent, s uṣuγu n yelmeẓyen d taγratin n tlawin.Syen tawacult n Si Lḥussin d tesqamut n taddert At-Ḥmed rran tajmilt i kra n wid id-yussan ama s lqarb ama s lbaεd cebḥen tamḍelt n Dda Lḥussin ara d-yeqqimen d asmekti i tsutiwin id-iteddun.
Islam Bessaci