Seg wid yellan ur ɣrin, neɣ ur asen-d-tsaḥ tegnit ad xedmen deg walbeɛd n yimeḍqan, deg tɣiwanin n Tsexriwt ed Ayt Smaɛel ladɣa, aṭas n yilemẓiyen i nwala ferḥen ayendin ussan-a yezrin, beyynen-d asirem d ageɛmir segmi yettwaldi s wudem unsib Unammas n Usileɣ Asadar (Centre de Formation Professionnelle) n Lberj n Mira, taɣiwant n Tsexriwt, sɣur uneɣlaf i teɛna taluft, ddurt yezrin. Aṭas-aya, yuɣ lḥal, netta yettraǧu ad yettwaldi unammas-a ideg ttwassaramen yimeḍqan n uqeddic, wanag atan almi d tazwara n useggas-a amaynut i yeldi tiwwura-s. Ad d-nesmekti dakken ar tura mačči aṭas n tgezmiwin (sections) i yellan deg unammas-a. Ala snat – taxeyyaḍt, ed ubnaw – di leɛḍil ad d-nnulfunt tiyaḍ deg teɣzi n wakud ɣef wawal n yiwen seg yimḍebbren n tɣiwant. Ar tura llant kan snat n tgezmiwin i wid yebɣan ad yelmed, maca ad ilint tiyaḍ sey-a ɣer sdat. Ula d mass aneɣlaf yessuter ad d-ssekren ilemẓiyen deg yiḥricen swayes ara afen axeddim s teshel. Kra n rray inuḥen, yeqqar-d belli anammas-a ad yessenqes xilla seg lmeḥna n wid ur nettaf axeddim. Ihi, i win yebɣan ad ijerred iman-is din, ilaq-as kan ad yelḥem ɣer tmehla-s akken ad iẓer d acu d ikwaɣḍen i as-ilaqen. Ɣas tura yella kra yettmaggan daxel-is, meɛna aya yettili-d di leɛḍil kan, imi akken nessaweḍ neẓra, aseggas amenzu ad yebdu seg ctember i d-iteddun.
Mhenni Xalifi