Tettseḍ neɣ tesmeɛẓgeḍ, ur tebɣiḍ ara ad d-qessreḍ yid-i. Ssneɣ-k ! mačči d tikkelt tamezwarut ! akka i teggiḍ d acu i yuɣen «la mémoire»-inek.
-Ulac, sussmeɣ ur d tt-wajebeɣ ara, acku ẓriɣ ur tettamnen ara ma nniɣ-as, steqsa-ɣ-d amejjay ɣef «la mémoire»-inu.
-Aṭṭan-ik mačči d «la mémoire», aṭṭan-ik d «l’égoïsme». Susem ma tebɣiḍ ! ula d nekk ur bɣiɣ ara ad ssleɣ i ssut-ik.
-Teffer aqadum-is s tfersadit, terna tezzi-d aɛrur-is. Terfa acku nettat tebɣa ad nexdem «le shopping» nekk bɣiɣ ad d-ẓẓreɣ amejjay, acku ixemjan-agi sɛiɣ deg wallaɣ-iw, xdemen-iyi-d aṭas n wuguren, tt-xemmimeɣ aṭas yerna tqelliqeɣ, asrirem yebda yettaǧǧa-yi waḥd-i. Uɣaleɣ tettuɣ akk ayen ilaqen ad cfuɣ fell-as. Senṭerren-iyi yimdanen mi ara d ḥekkun tiqsiḍin n zman aqdim. Ceffun ula ɣef «les détailles» imecṭaḥ. Ma d nekk, tettuɣ ula d isem n tmeṭṭut-iw. Tiswiɛin ticeki ur terfi ara testeqsay-iyi-d teqqar-iyi-d :
-Amek isem n tmeṭṭut-ik ?
-Nekk imir-nni ad uɣaleɣ d azeggaɣ, tt-ḥireɣ d acu ara d iniɣ, i wakken ad iyi-d-ɛiwen, teqqar-iyi-d isekkilen yiwen, yiwen. Maca ur zmireɣ ara a ten-id-ssdakleɣ akken ad d-iniɣ isem-is, ad as-tiniḍ yekka-d si tɣerma ur nessin ara isemi-is. Ar tagara tameṭṭut-iw ad terfu, ad iyi-tini :
-Aɛni warǧin tekcimeḍ s aɣerbaz ! aɛni agemmay-inek ur yesɛi ara isekkilen s-wayess yettwaru yisem-iw ? neɣ ahat isem-iw ur yesɛi ara azal deg wul-ik akked wallaɣ-ik !
-Tudert-iw tuɣal d taberkant, nekk ur ceffuɣ ara, tameṭṭut-iw tenwa ur tt-ḥemmleɣ ara. Nniɣ-as : «Kemm d tarwiḥt-iw, d tudert-iw maca ur iyi-tumin ara.»
-ttnadim amek ara tt-qennɛeɣ akken ad iyi-tamen. Nettat tesɛa lḥeqq nekk daɣen sɛiɣ lḥeqq, mačči s lebɣi-w ma yella ur ceffuɣ ara, neɣ ma yella ttuɣ isem-is. Wamma, zik-nni asmi lliɣ d ilemẓi isem-is yettazal deg yiles-iw am usefru, tayri-nneɣ teǧǧuǧug trennu, am yemɣi n tefsut. Ass-a nezga d amenuɣ am uzal am yiḍ, ah ! a wi d-yerran iḍelli, ad yesfeḍ imeṭṭi n wass-a. I wakken ad mmektiɣ isem-is, sɛeddayeɣ-d ismawen n tlawin deg wallaɣ-iw wa deffir wa, Zwina, Crifa, Ṭawesn Feṭṭa…. Maca isem-is yezga ireggel fell-i am tili. Cfiɣ asmi d tedda d tislit, di lɛemer-is ɛecrin n yiseggasen. Nekk ssawaleɣ-as s yisem-is, nettat kifkif, tessawal-iyi-d s yissem-iw. Tayri-neɣ ur tesɛi cekk, tuɣ tafat n wussan-nneɣ. Ass-a axxam n tayri-nneɣ yegrurej, amzun aken ur asen-hegga ara lsas. Yiwen wawal d amecṭuḥ ur as-cfiɣ ara, ula d isem n tmeṭṭut-iw ttuɣ-t. Tatut texdem tawaɣit di tayi-nneɣ am arẓaẓ ikecmen taɣrast, neɣ am uccen ikecmen tagrurt n wulli.
-Tiswiɛin tt-xemmimeɣ, qqareɣ-as : «acimi ur ttruḥeɣ ad ḍelbeɣ «le diorce» maca d acu ara as-iniɣ i «le juge» ? argaz-iw yettu isem-iw, imdanen ad ttaḍsa fell-i, ma d «le juge» ad iyi-d-yini tagi mačči d sebba n beṭṭu-nwen. Ruḥ uɣal s axxam-im, ḥmed Rebbi tesɛid argaz. Aṭas n tlawin ur ufint ara ula d rruḥa-s. irgazensɛan uguren d imeqranen, yerna sebbren, ssusmen ! Nniɣ-as yiwwas : «kemmini d ul-iw, ɣur-m i tcudd tarwiḥt-iw» Terra-yi-d, tenna-yi-d : «lukan nekk d tarwiḥt-ik, ur tettuḍ ara isem-iw xas ma tunageḍ, anda ma tebɣuḍ truḥeḍ. Ur d yeqqim ara wacu ara k-id-yessmektin isem-iw. Zzin-iw iruḥ ččant wuguren, temẓi-w truḥ ɣedren-tt iseggase, lwert yugit baba, yenna-d tilawin ur ttawint acemma.
-Yiwwas di tergit ttnadiɣ isem-is ur tufiɣ, qellbeɣ deg yigenni, qellbeɣ di lebḥer akked tniri, ulac. Steqseɣ itran akked iselman, ijdi akked waman… Tagara ferḥeɣ ufiɣ-d isem n tinn aɛzizen. Ttaḍsa-ɣ waḥd-i di tergit, sawaleɣ s yisem n Ǧamila, Ǧamila… Ziɣ d isem n tayri-w tamezut id mmekta-ɣ. Tessaki-yi-d tmeṭṭut-iw, ssliɣ-as tenna-yi-d :
-«d acu n Ǧamila-agi id mmektaḍ akka s taḍsa ? tagi ha-t-an tugid ad tt-ttuḍ isem-is !
Tullist n Abed el-hamid BENHEDOUGA. yerra-tt-id ar teqbaylit Boussad HAMMAR