Tezzi ihi deg Ayt Smaɛel tfaska n tmedyezt tamaziɣt s wayen akk llan ssarmen wid tt-yennumen s yimedyazen ed yimeɣnasen s umata. Ugar n tiwin n tmedyezt s tmenna yemgerraden, tin igerrzen, sɣur yimedyazen, tella-d tejmilt n wannuz i Lwennas n Ayt Lewnis (Meɛtub) s temzikknin (expositions), kraḍ n yisaragen gar wass amenzu ed wis sin, akked yiwen n uḥanu (atelier) ɣef umecwar-is n ccna sɣur massa Wataḥ Lynda ed temrawin n yimedyazen ed yimeɣnasen. War ma nesha ttiɛad ageɛmir n ccna sɣur Bujemɛa Agraw, ilemzi n Ayt Smaɛel Wali Ɛebdelɣani, rnu-yas ilemzi nniḍen seg tama n Bgayet. Akken, mi d-tewweḍ ass aneggaru tegnit n tikci n warrazen, iɣef ur d-nemmeslay ddurt yezrin, isaḥ-d warraz amezwaru i sin n yimedyazen Salmi Musa ed Qasa Taɛerqubt. Wis sin d tamedyezt Buciba Fatiḥa i t-yewwin, ma d wis kraḍ fkan-t i yilemẓi Qeddur Rabeḥ. Seg warrazen i yettunefken, yella-d daɣen warraz n yilemẓi i mass Bari Ɛebdelɣani, win n tmeṭṭut d Buseksu Linda i t-yuklalen, win n yimezgi i Sellam Ɛebdelḥamid, win n umɣar yeggra-d i Brabez Muḥend, ma d wid n tantala ttunefken sin i massat Lantri Raḥima akked Katyusajaḥ Ɛebdelwahab. Nnan-d awal ɣef tfaska-ya : Fares Bakuc (aselway n Tdukkla Tadelsant Adrar n Fad): Deg wayen yerzan ahil n tfaska-ya, yeḍra-d merra wayen i d-nhegga. Amsizwer daɣen iɛedda deg tegnatin igerrzen, ideg nesla i tmedyezt tufrar, nwala udmawen d imaynuten. Ad snemreɣ kra n win i d-yefkan afus n tallelt deg usuddes (organisation) ladɣa ilemẓiyen n Udrar n Fad. Qeddur Rabeḥ (Arraz wis kraḍ) : Tazwara ad rreɣ tajmilt d tameqqrant i Tddukla Tadelsant Adrar n Fad ɣef leqdic-is i ur nesɛi tamtilt. Ma ɣef warraz wis kraḍ i d-ḥellaɣ, tidet kan ur gmineɣ ara fell-as imi i tikkelt tamenzut i ara ttekkiɣ di tfaska-a. Ɣas ma isefra swayes tekkiɣ d ayen yellan d amaynut. Leqdic n tfaska d ayen i yi-yeswehmen, imi fkan-as yiwen n rruḥ i tsekla taqbaylit d tmedyezt s umata. Ad hduɣ arraz-iw i yimeɣnasen n teqbaylit akken ma llan, ama ddren ama mmuten.
Mhenni Xalifi