LEZZAYER TAMANEƔT – I lmend n wesfugel n umulli wis 400 n tmettant n umaru aspenyuli Miguel de Cervantes, yebda-d, ass n lexmis, wesɛedi n yifetrawen (acriṭa wata’iqiyya) ɣef tmeddurt n umaru-a deg Lezzayer Tamaneɣt. Tadyant-a tella-d deg Usudu n Cervantes n Lezzayer Tamaneɣt s wemɛawen d wenmahal n Spenyul deg Lezzayer. Asudu n Cervantes ad d-yesɛeddi 4 n yisura tikkelt i dduṛt, yernu ad ikemmel waya arma d ass n 28 Yebrir. Asaru amezwaru ay d-sɛeddan d «Tisselbiwin n Don Quijote» ay d-yessawalen ɣef wemsudem-nni (caxṣiyya) mechuṛen ay d-yesnulfa umaru-a. Asaru-a tfures-it-id tliẓri taspenyulit, yettaḍḍaf snat n tsaɛtin yernu yesɛedday-d tidyanin tixatarin (hamma) n Don Quijote d tuqqna-nsent ɣer umezruy d tsertit (tagara n lqern wis 16 d tezwara n wis 17) ay yeǧǧan Cervantes ad yaru ɣef waya. Adlis n Don Quijote yebder-d 5-nni n yiseggasen ay yekka Cervantes d ameḥbus deg Lezzayer Tamaneɣt asmi ay tella ddaw udabu aɛetmani. Tadyant-a n wesɛeddi n yisura semman-es «Allus n terzi ɣef Cervantes» yernu tella-d ɣer yidis n yermuden (nacaṭat), gar-asen awway n yibalmuden (talamid) akken ad ḥewwsen deg Lezzayer yernu ad ssnen amkan aydeg yeqqim Cervantes seg 1575 ɣer 1580, ɣef wakken ay d-tenna tnemhalt n Usudu n Cervantes, Raquel Romero Guillemas. Tirzi-a d-yellan i lfayda n yibalmuden n yiɣerbazen inagduden d wusligen s wemɛawen d tɣiwant n Mohamed-Belouizdad, ad teqleɛ seg Leqṣer n Ṛṛeyyas (Bastion 23), ad tekk ɣef Teqṣebt n Lezzayer, sakkin ad taweḍ ɣer Yefri n Cervantes d-yusan deg wegmam (ḥayy) n Lḥamma, anda ay yeffer umaru-nni d 13 seg yimeddukal-nnes asmi ay yeɛreḍ ad yerwel. Ifri-nni ay yeqqimen acḥal yettweǧǧ, yuɣal yesɛa taɛessast yernu tṣeggem tɣiwant n Belouizdad aḥric seg-s s lemɛawna d tmahelt (safara) n Spenyul deg Lezzayer. Nnig waya, seg yimir-n ɣer wass-a, uɣalent ttilint-d din tnemsal (waracat) i yigerdan.Ass n 23 Yebrir yellan d amulli n tmettant n Cervantes (yemmuten deg 1616), ad yili daɣ d ass n «tɣuri yettkemmilen» n wedlis n «Don Quijote de la Mancha» s tutlayin yemgerraden deg Usudu adelsan aspenyuli.
APS