Asfugel n tmeγriwin d tmesbaniyin n yedles n teqbaylit d tmaziγit s umata, am usmekti n umuli wis 36 n tefsut n yimaziγen, amuli wis 15 n tefsut tabbarkant, d umuli wis 04 n tmettant n unaẓur Mhenni Amroun i yemmuten ass n 19 yebrir 2012, yemḍel azekka-ni n wass n 20 yebrir. Dγa Tiddukla Tadelsant Tiεwinin n Wizgan lwilaya n Tizi-Wezzu, tesudus-d yal seggas yiwen n leqdic s wazal-is i usebγes n tutlayt n tmaziγt. Dγa aseggas-a, timzizelt tis 03 n tzabut s tutlayt n tmaziγt n waraz Mhenni Amroun tella-d ass n 16 yebrir 2016, i yellan d ass aγelnaw n tusna. Tamesbanit-agi yesduritt-id uγarbaz amezwaru Hammadi Muḥend Saεid, id-yezgan di tlemmast n temdint n Wizgan, anda i ttekan di temzizelt-agi nnig n 270 n yinelmaden n 03 yeswiren yemgaraden, amezwaru, alemmas d tusnawit naγ wis 03, id-yussan si 70 n yiγarbazen temnaḍin yemgaraden n lwilaya n Tizi-Wezzu. Akken iḥedren nnig n 30 n yiselmaden n tutlayt n tmaziγt n temnaḍin yemgaraden n lwilaya n Tizi-Wezzu, id-yeldin ulawen-nsen i leqdic-agi yesεan azal meqren. Igemmaḍ n temzizelt-agi bannen-d s wudem unṣib ass n 20 yebrir 2016, anda iεeggalen n tiddukla tadelsant tiεwinin n Wizgan, heggan-d yiwet n tmeγra meqren n tikci n warazen i wid id-yufraren deg 03 n yimukan imenza, d igardasen n usebγes i merra inelmaden. Igemmaḍ n temzizelt-agi , deg uswir amenzu d tanelmadt Hammoum Kenza i yeqqaren deg uγarbaz amezwaru « Bouda Muḥend Saεid », id-iḥaren amḍiq amezwaru. Aswir alemmas d tanelmadt Brahmi Faṭima n uγarbaz alemmas « Azoug Arab d mmi-s Saïd » id-ufraren deg umḍiq amezwaru. Ma yella d aswir wis 03 di tesnawit, d tamsiwt Sadi Lyticia d tanelmadt n tusnawit Kulunel Muḥend Welḥağ. Tameγraa-agi yesduritt-id wexxam n yedles kulunel Muḥend Welḥağ n taddert n Wizgan, s leḥdur n nnig n 300 n yinelmaden n yeswiren yemgaraden, imawlan-nsen, iselmaden n tmaziγt, inemhalen n yiγarbazen, imḍebren n tmahliwin n trebga d yedles n lwilaya n Tizi-Wezzu, imḍebren n tγiwant n Wizgan d waṭas niḍen. Iswi n temzizelt-agi n tzabut d asebγest n tutlayt n teqbaylit d usnarni deg uswir n yinelmaden, akken tutlayt-nnaγ ad- tifrir ger tutlayin niḍen.
Islam Bessaci