Ulac wid izemren ad ttun tadyant n wass-nni amcum n 26 deg yebrir n useggas n 2009 i d-yeḍran deg tɣiwant n Ayt Smaɛel. D abaxix i iresxen deg yiqerra n yimezdaɣ n Bgayet aniɛad wid n Udrar n Fad. D abbeɛzeq i beɛzqen wulawen n umecṭuḥ ed umeqqran. Mi d-yekker yiwen n yilemẓi i yeffeɣ leɛqel, iɛewwel ad yeg talast i tudert n teqcict n 15 n tefsutin, n tuḥrict ifazzen i ur nga kra, mu ssawalen Sunya. Nettat deg nniya-s, mi d-teffeɣ tameddit-nni am nettat am yinelmaden seg uɣerbaz-is alemmas, ur teẓri ad d-yezg yiwen n wat-is deg ubrid-is am ublaḍ yeqquren. Dɣa aqcic-a, mi tt-yetthewwil s yimeslayen nettat tebɣa ad terwel, yefka-yas kra n tiyitiwin deg tfekka-s s lmus i yella yettawi, send ad t-yessentu deg-s daɣen ad yeɛreḍ ad ineɣ iman-is. Kra n wakud akken, Sunya ur tessaweḍ ad d-taki deg usbiṭar n Txerraḍt (Xerraṭa) ma d win igan anɣa (crime) rran-t ɣef deffir n uẓekrun. Ass-a ɛeddan sebɛa n yiseggasen gedged segmi i aɣ-teǧǧa Sunya Idir d tasfelt n tinnuzɣa ed yir taɣellist (sécurité). Ɣur medden n temnaḍt-is ad as-tiniḍ d yiwen n wass kan. Teṭṭaxxer seg ddunit n yihwah, ddɣel ed tismin, wamma mazal-itt deg yal yiwen tettidir. Deg waya, tenwa tdukkla tadelsant Adrar n Fad, acḥal-aya tura, ad as-tesbedd yiwet n teplakt d asmekti, d tajmilt, maca atan werɛad d-yeḍra. S teplakt-a, ideg ara yili ula d yiwen n usefru d tajmilt, tenwa tdukkla ad tjerred tadyant-a deg umezruy ad tt-ssnen ula d tisutiwin i d-iteddun, ladɣa inelmaden. D tiɣri daɣen i uḥezzeb ed usegmi ilaqen n tmetti, imi Ayt Smaɛel ur tennum ed wayen ur iqebbel wallaɣ. Taluft n talwit teɛna yal yiwen ed tal yiwet !
Mhenni Xalifi