Tadyant n Si Saεid At Ccix

Yiwen n Ccix si taddart n At Buyeḥya ssawalen-as Si Saεid At Ccix. Netta, seg uxxam n At Ccix. Ɣur-s kan yiwen n gma-s isem-is Muḥ Crif. Ccix Saεid ilmed ɣer Ccix Muḥend u Lmexttar deg At Yenni, netta d umedyaz amenṭran si Muḥend u Mḥend myussanen d imeddukel. Si Muḥ Saεid-agi iqqar zik, akka i yi-ihwa imi d bab n ddree, yetteeddi wawal-is. Mi yuɣal d Ccix, iceyyex di taddart n Tgemmunt Ukerruc. Ttqadaṛen-t, ḥemlen-t nezzeh din, imi d bab n lefṣiḥ, iferru-tent. Ircel seg At Hlal, yuɣ yelli-s n Lḥaǧ Aεli u Saεid. Ssawalen-as Feṭṭa n Lḥaǧ Aεli u Saεid, agur deg yigenni nettat di lqaa. Qqaren-d, sut At Hlal mi ara ḥejbent ur seɛeunt ara dderya, d ddeewa n jedd-nsent. Seg tuɣ Ccix teḥjeb, ur tesei ara dderya. Myefken leahed netta yid-s, netta yenna-as, ma temmuteḍ d tamezwarut, ur rniɣ fell-am tameṭṭut. Nettat tenna-as, ur rniɣ fell-ak argaz. Assen, di taddart-nni n Tgemmut Ukerruc, yiwen uqcic akken kan yezweǧ bḍan-t d tmeṭṭut-is. Iwwi-tt baba-s s axxam-is: baba-s n uqcic d baba-s n teqcict nuɣen, msawaḍen ɣer lmuḥal. Nutni, aqcic d teqcict mtawan, myeḥmalen seg wul. Wigi, ceyyeen lejme ad tt-id-erren, wid-nni ugin. Wigi suturen tiririt, wid-ak berru. Nutni mtawan, bɣan ad ten-bḍun. Lḥan imṛabḍen ad tt-id-erren, imawlen ugin. Imiren Si Saεid At Ccix ḥemlent nezzeh din, ttqadaren-t aṭas. Iṭṭef deg-s uqcic, inna-as ad iyi-tt-id-terreḍ. Iwweḍ Ccix iḥawet, iḥawet, imawlen ugin. Iguni-t uqcic-nni alammi d-yeffeɣ, yenna-as: amek akka a Ccix? Yenna-as Ccix: beddel abrid a mmi, ugin imawlen. Mi t-iwala Ccix inuɣna, yenṭaq ɣer-s, yenna-as : tḥemleḍ taqcict-a! -Wwah a Ccix ! Ma ḥemleɣ-tt! D tudert-iw !. -Yenna-as Ccix : Ruḥ ! Ma ur n-tbedd ara weḥd-s, nekk mačči d Si Muḥ Saɛid. Iwweḍ Ccix s axxam, iddem-d azmam, yura-as taḥerzet, ifka-as-tt, inna-as eelleq-as-tt deg ubrid n tala u ɣur-k wi k-id-ittwalin. Aqcic ixdem akken i as-d-yenna Ccix. Mi d-tuɣal teqcict si tala terra srid ɣer urgaz-is. Iffeɣ lexbar di taddart, ǧǧan-ten weḥd-sen. Lḥan acu lḥan, di lexṛif, ssawlen-as i Ccix ad d-yas ad yaru i tmuḍint. Yaf tameṭṭut iwumi ara yaru, isem-is Meḥjuba. Iddem-d azmam, netta yettaru aqelmun alammi d allen . Yiwen urgaz iqqim-d ɣer tama-s, sin ddurin di tkenna, wayeḍ idduri-d addaynin. Win d-iqqimen ɣef tama-s, iereḍ ad t-ixnaq s uemam. Yerra-as ixebbic Ccix deg wudem-is. Rsen-d wid-nni n tkenna, yerna-d win n waddaynin, ddmen-d taqabact, qeddṛen-t, nɣan-t. Armi d iḍ, suffɣen-t-id di tcekkaṛt, sersen-t di Tezṛut n Aεmar u Buyeḥya di tlemmast n taddart. Deg yiḍ-nni, iffeɣ-d yiwen, ad isefqed ṭṭaṛḥa-s, yufa-d tacekkaṛt deg ubrid, illi-tt, yufa d Ccix i immuten. Yessaki-d Lḥaǧ Muḥend u Sliman, lamin n taddart . Sekkren-d taddart, eezṛen fell-as. Azekka-nni, nudan, ufan wid i t-inɣan . Si Muḥend u Mḥend tuɣ-it lḥal deg usammer n tmurt, iqqim di lqahwa. Ufan-t-id ixeddamen iḥzen, iggugem. Nnan-as : d acu k-yuɣen ? D acu i k-ixuṣen ? Yella wi k-iḍelmen ? Si Muḥ yerra-d nnehta, yenna-as : Yewweḍ-iyi-d lexber d uswid Ul-iw yettnehdil-d Lfahem irekb-it lɣac Tɣaḍ-iyi tarrawt n Sid Si Muḥ Saɛid Tamtilt-is beṛṛa ulac Iɣder-it lqum lyazid Wwten-t s lḥid Qeddṛen-t s uqabac. Iawed, inna: Ɣedren cbab Ur t-iklal Tamtilt-ik ur d-tettili Asmi ixeddem deg yir laεmalIleḥḥu s wuzzal Anda i s-ihwa i yettili Ma d tura itbe leḥlal Ittwaxdeε deg uzal Imzel timezla uḥuli. Wwin-t-id s Akal-aberkan, imḍel dinna. Ibedd gma-s, si Muḥ Crif At Ccix ɣer uqerru-s, inna-yas: «Ffkiɣ laεhed, ffkiɣ-t i Rebbi, ur seṭṭleɣ tamart, wala acebbub, ur kcimeɣ s axxam alamma rriɣ-d ttaṛ-ik neɣ rniɣ-n ɣur-k..» Lfuci ɣef tayet, iffeɣ d lmenfi. Iruḥ uqcic-nni iwumi tettwakkes tmeṭṭut ɣer-s, yeggul yenna-as, ma ǧǧiɣ-k, ara ak-iwneɣ. Assen, uɣalen-d sin seg wid inɣan si Tizi-wezzu, si ccṛae. Rekben-d ɣef yiserdyan deg Wasif n Lqennaṛ ger Teɣzut d Wat Mesbaḥ, wa yewwet wa, wa yewwet wayeḍ. Ɣlin-d di sin yid-sen. Aqci-nni, n Tgemmunt ukerruc yerwel d asawen, yemnee. Ma d si Ccrif, yerra d akessar, ɣer tɣezza; ikka-d fell-as laeyaḍ, ṭfen-t-id wid ikerzen din, wwin-t ɣer lqayed. Azekka-nni, usan-d ixeyyalen wwin-t yid-sen ɣer lḥebs. Iεedda di ccṛaε ḥekmen-as sebea n yiseggasen di lḥebs n Kayen. Yewweḍ ɣer din, iseedda xemsa iseggasen, tamurt-is akk tekfa s lbie. Yiwen wass, tekker tmes deg uxxam n tmeṭṭut unemhal n lḥebs, ala tettuɣu, ḥuzen-as sin warraw-is. Aqcic d teqcict ṭṭsen deg uxxam-nni deg tekker tmes. Wi ara ten-id-yekksen? Yuzzel Si Muḥ Crif, netta eeryan. Yewweḍ, yufa-ten ṭṭsen deg umetṛaḥ. Yenneḍ-iten-id di tfarṣadit, iccud-iten-id s umrar, isers-iten-id. Ufan-ten uread ukin. Teɣli yemma-tsen, tefsex. Yers-d si Ccrif, ibaṛdiyen-is rɣan akk, tḥelj-it tmes. Mi d-tefḍen tṛumit-nni, tenna-as: D acu i tebɣiḍ? Yenna-as Si Muḥ Ccrif : d acu i bɣiɣ! Akken tebɣiḍ arraw-im i ten- bɣiɣ! Tenna-as trumit: “D tuffɣa i tebɣiḍ ad teffɣeḍ! Ma ur teffiɣeḍ ara! Ma ur uɣaleɣ ara deg umkan-ik, nekk mačči d leflentega! Truḥ, tura fell-as, tenna-as argaz-agi inɣa yiwen, icfaε sin. Dɣa suffɣen-t-id. Tameṭṭut-nni n si Saɛid At Ccix truḥ-d s axxam n baba-s. La d-kkaten medden ɣer-s akken ad tezwej, nettat tugi. Tmekta-d laεhed i tefka i urgaz-is. Seg la d-kkaten yixxamen ilhan, inna-as baba-s, ad tzewjeḍ neɣ ad kem-selmeɣ. Iḥers-itt, iwwet ɣer-s lḥaǧ Belqasem, yuɣ-itt: A sidi Lḥaǧ Ali Nɣil-ik d argaz leali Tefkiḍ yelli-k i wakli Asmi yesla Si Muḥend u Mḥend, yewwi asefru, yenna-as: Awwah a lmut d-yettassen Ɣer lbaz meẓẓiyen Wagi d lwaed n Rebbi Zwaǧ-ik ara t-id-xeṭṭben Idawen-ik ferḥen Kul wa ansi d-yeṭṭili A Sidi Aεmar u Brahem Aql-aɣ netwehhem Yereq ubrid ara nawi. Teqqim ɣer Lḥaǧ Belqasem d acu teqqim, ssyin truḥ-d. Yuɣ-itt yiwen umerkanti n At Meḥmud ssawalen-as Muḥend At Allal. Teqqim d acu teqqim, daɣen truḥ-d. Ar taggara yuɣ-itt si Ḥmed u Lεarbi si taddart n At Buyeḥya. Netta yemmut d amezwaru, ma d nettat temmut d tamɣart di lgirra-nni n 54.

Tettwakkes-d seg udlis “Zik-nni seg At Dwala” n Ramdane LASHEB