Tazrigt tamezwarut n talγuγa taγelnawt n waffug n tegnawt i d-tessudes tfidiralit tazzayrit n waffug n tegnawt, s lemεawna n tiddukla n wadal idurar d waffug n tegnawt n temnaḍt n Wizgan d tenmehla n yilmeẓyen d waddal n lwilaya n Tizi-Uzzu, i d-yeḍran ass n 26 maggu 2016 di temnaḍt n Wizgan anda i d-ttafgen seg udrar n Uswel deg tγiwant n At-Zikki γef laεli n 1580 lmitrat, almi d annar n waddal n taddart n Saḥel, taγiwant n Wizgan, tessuli leqdic-is ass n 31 maggu yezrin, anda i ttekan 38 n yinaddalen i d-yussan si 26 n lwilayat yemgaraden n tmurt. Amḍiq amezwaru iḥerri-t-id unaddal Ḥamouche Djaffar n tiddukla n waddal n yidurar d waffug n tegnawt n temnaḍt n Wizgan lwilaya n Tizi-Uzzu, yuγal d alγuγ aγelnaw n ṣenf n waddal-agi, affug n tegnawt n useggas 2016. Tameγra n tikci n ciεat, arazen d yigardasen n usebγes tesduri-t-id tzeqa n tmeγriwin « Tajeğğigt n Yires » n tγiwant n Wizgan anda iḥedren yimḍebren n tfidiralit tazzayrit n waffug n tegnawt, tanmehla n waddal d yilmeẓyen n lwilaya n Tizi-Uzzu, imḍebbren n 04 tγiwanin n la dayra n Wizgan, inaddalen d waṭas-niḍen. Inaddalen d yimḍebren n tmesbanit-agi tanaddalt, farḥen aṭas s tegnatin yelhan ideg-i tεedda talγuγa-agi, imi ttawilat akk iwulmen llan deg umkan. Acu kan, iban-d kra n lexṣaṣ n lembat, imi ulac assensu n yilmeẓyen « Auberge de jeunes », ara yesneqsen taεkkemt ama γef yinaddalen, ama γef imarayen d yilmeẓyen.
Islam Bessaci