Taḥanut d yiwet gar 23 n tuddar n tɣiwant n Ait Aissa Mimoun. Tezga-d ɣef ugafa n tɣiwant-agi, tebԑed ɣef temdint n Tizi Uzzu s wazal n 15 km.
Taddart-agi, mazal-itt ar ass-a n wussan tettiddir deg waṭas n yiɣeblan d wuguren, imi tuget n yisenfaren n unegmu i tt-id-yeṣuḥḥen , mazal urεad bdin. Deg wayen yeεnan isenfaren i mazal ur ttwaxedmen ara deg taddart-agi, ad d-nebder di tazwara asenfer n Lgaz. Mazal ṣsawḍen deg-s 10%. D ayen yeğğan, dɣa, imezdaɣ n taddart -agi nḥafen aṭas, ladɣa deg wussan n cetwa , imi acḥal n tikkal i leḥun d likumiṭer i wakken ad d-awin taqqerԑat n lgaz. D ayen iten-yeğğan ad d-gren tiɣri, yerna ad ssutren deg wid teԑna temsalt, gar-asen imeḍberen n tɣiwant n Ait Aissa Mimoun d Tenmehla n Imuhal Izuyaz (Direction des Travaux publics), i wakken ad ɣiwlen ad frun tamsalt-a, acku temdel tewwurt n tḥanut yesnuzun Lgaz di taddart-a. Gar yisenfaren, daɣen, yellan deg wahil i mazal ur ttwabdan ara imuhal-nsen, ad naf aεiwed n kra n yiberdan yellan daxel n taddart s ssiman, i wakken ur yettilli ara uɣebbar deg unebdu wala axmir neɣ aluḍ di ccetwa. Mazal, diɣen, akemmel n tqentyar yesuffɣen aman ugeffur i yiberdan-agi imaynuten i wakken ur tesyixen ara deg tegrest. Wigi d wid yellan deg wahil, maca mazal kan ur ttwaxdamen ara. Mazal aṭas n yisenfaren i ilaqen ad ttwaxdamen, gar-asen: axxam n yilmeẓyen, ideg ara dhun yilmeẓyen n taddart-agi. Tiwin n ttawil n Lantirnat (L ‘Internet) s ixxamen, i wakken ad sifsusen taεkumt ɣef yimezdaɣ-is. D lbenni n lğameε n taddart, am tuddar akk-nniḍen. Aẓrab n tmeqbert n taddart s yiɣaladen neɣ s ugɣeryağ i wakken ur ikeccem ara lmal ɣer daxel. Rnu ɣer-s, asebdad n uḥeddad ara yettwabnun deg tlemmast n taddart.
ADAOUN Abdelghani