Send iḍelli kan i yemden 18 n yiseggasen ɣef tibawt-is, ɣef wass-nni amcum i izelzen ulawen n yiqbayliyen, imaziɣen akked madden-nniḍen i t-yessnen, i t-iḥemmlen daɣen. Ass-a kra wid i t-iḍefren, i yeslan i yimeslayen-is ama deg tezlatin, neɣ deg tedwilin, ur yeqqar Lwennas yemmut. Anaẓur, agrawliw, amussnaw, yettɣib kan s tfekka d rruḥ, maca ayen i d-yeǧǧa, yettɣimi i lebda. Ɣas ma yettwaccelqef seg gar n wallen, aql-it yedder yettidir, yerna mazal ad yidir ɣer sdat. Ula d arrac imecṭaḥ i d-ilulen seld tibawt-is, atan ssnen-t ḥemmlen-t ulama ur d-ufan rruḥ-is yella. Ufan-d yiwen n yisem swayes i d-yennerna, yefti d xilla n yismawen. Yal yiwen seg-sen d lɛali-t imi iban dakken Dda Lwennas d amdan i yuklalen aṭas n lɛez d tayri. Daymi nezga d imekdiyen i yisem-is azedgan i yewwten ɣef tukksa n lḥif n yimeɛfan, i yesḥefḍen i yesseknen ayen i yettwaffren i ugdud n tmurt-is i yettawi dima d anezgum-is. Tabɣest i yesɛa, tewweḍ taseddart d tameqqrant, ula d aḥulfu n ukukru ur t-yeǧǧa ad as-yesseḥbes tikli i yebda, neɣ ad t-id-iwexxer ɣer deffir. Netta d argaz i yeččuren d irgazen, d win i d-irebban, i d-yessekkren irgazen, d bu temsirin ur d-ttakken yiɣerbazen, d wihin i yufraren i ifazzen. Acḥal i yesɛa d tarwa i as-d-irennun i ara as-d-yernun tarwa. Simmal ṭṭuqquten wid i t-yettḥibbin, ẓran dakken lemmer mačči d netta, tili ur telli akka. Ɣas ulamma lukan ur iɣab ara, iban addad-nneɣ ur yettili am wa n tura: ad ibeddel kullec seg yal tama. Lameɛna s wayen i d-yeǧǧa i nekker nelḥa. Yessexreb lecɣal amek i d-yenna, yesseɛreq awal s lehḍir d ccna. Atan mazal annect-nni ur yefni. Mazal aɣref-is yettkemmil ayen i yebɣa: ur tt-yefra s trewla, ur yettwaqqen s ssnesla. Akken tenniḍ: ‘’d lwajeb asirem ad yili, deg wulawen ad yefti, ɣas akka lweɛd la iteqqes.’’ Ihi s usirem iɣef tettwessiḍ i yettwanjar ubrid ideg telḥiḍ, yis-s amennuɣ yettkemmil alami i yettwaseggem lkil. S lexsas neggar tiɣri, nessiwil, ur nɣeffel ad aɣ-yesseɣli lmil, ur neẓẓuɣɣur ur nettɛeṭṭil akken ad neg ttawil. Ass-a, azekka, Dda Lwennas yella yella.
Kaysa Khalifi