Taddart n Yilyiten I d-yezgan deg tɣiwant n Saharidj tettidir ar ass-a mebla ma yewweḍ-as lgaz n temdint. Imezdaɣ-is I yegren tiɣri I yimḍebbren terza taluft ferḥen di tizwar, imi tettuɛeggen-d yiwet n tedrimt s wazal-is ilmend n usiweḍ n wallal-a I yal axxam. Azal n 350 n yixxamen I yettujerden, din din lecɣal bdan, aɣizi, asiweḍ n yiqudas, almi nwan At Yilyiten dakken ad fɣen s tidet seg lmeḥna. Maca, ur ḍulen ara wussan almi texsi tirgit n ṭṭmeɛ. Yeḥbes uxeddim, mebla ma ẓran yimezdaɣ ifukal n tedyant-a. Ulac tawwurt ideg ur wwiten ara, meɛna ssebbat ur d-banent ara. Qrib n sin n yiseggasen aya, ur tuɣal tkebbanit yebdan axeddim iwakken ad tkemmel lecɣal-is. Asenfar mazal-it iɛelleq ar ass-a. Ilaq kan ad d-nesmekti dakken taddart-a tettidir lixsas meqqren n lgaz n tqerɛet imi ulac yiwet n tḥanut I waya, d ayen yeǧǧan imezdaɣ-is ttaqen-d as afar-a seg tudrin tiǧiratin, ayen yesseɛwaqen fell-asen taswiɛt mi ara teqseḥ tegrest.
S. M