Gar wayen i yesnernan igemmaḍ n yikayaḍen n yal aswir n leqraya deg lwilaya n Tizi Uzzu, ad naf tizmilin-nni igerrzen i d-ttawin yinelmaden deg tutlayt n tamaziɣt. Xas ulamma mačči d tamaziɣt weḥd-s kan, llant ssebbat-nniḍen, am yimawlan i yetabaɛen leqraya n warraw-nsen, iselmaden i ixeddmen seg wulawen-nsen, aḥemmel n tutlayin tibarraniyin sɣur inelmaden iqbayliyen, anadi ɣef tmussni d tussna, acu kan, tamaziɣt, tesnerna igemmad s waṭas, armi tewweḍ lwilaya n Tizi Uzzu , teṭṭef amḍiq amezwaru i useggas wis tmaniya, wa deffir wa. Awal yemmeɣ d akken d tamaziɣt i d-yessulin igemmaḍ-a. Neɛreḍ ad nwali s leqreb, deg unnar, ma nezmer ad d-nawi ttbut ɣef wanect-a. Nwala tasnawit Ali Mellah anda qqaren akk yinelmaden tamaziɣt. Nesteqsa aselmad n tmaziɣt n tesnawit-a, Mass Karim Chaouche, ɣef tezmilin n yinelmaden d wamek i tezmer tanga-a ad tesnerni igemmaḍ n BAC. Yenna-d :’’95,53 % n yinelmaden wwin-d ugar 10/20 deg ukayaḍ n BAC. Ihi, tezmilin-agi, ɛawnent aṭas inelmaden i wakken ad ssiwḍen ad sɛun 10/20 neɣ ugar deg BAC. Mi ara nwali azal n 60 n yinelmaden i yesɛan ddaw 11/20 deg BAC, ad naf lukan mačči d taneqqiḍt-nni n tmaziɣt i ten-id-yessulin, ur ssawaḍen ara 10/20, meḥsub ur d-ttawin ara BAC.’’ D wa i d ttbud i aɣ-d-yefka uselmad-agi n tmaziɣt i yettmeslayen s yisem n xemsa-nniḍen n yiselmaden n tmaziɣt i yesselmaden deg tesnawit Ali Mellah n Draa El Mizan. Aṭas n yinelmaden i d-yeqqaren, diɣ, d akken tamaziɣt tettɛawan deg usegzi n temsirin n tutlayin-nniḍen. Ladɣa deg temsirin n tjerrumt.’’ S tmaziɣ i yeshel ad nefhem tamsirt n tjerrumt deg tmaziɣt. Syin, mi ara tt-nefhem, tettɛawan-aɣ ad nefhem timsirin n tutlayin-nniḍen imi qrib kif-kif tajerrumt.’’ I d-yenna yiwen unelmad. Zyada ɣef wanect-a, ad naf assaɣen gerrzen gar yiselmaden akked yinelmaden. Aya, yettak afud u yettaǧǧa inelmaden ad ḥemmlen, ‘’meqqar’’, tamaziɣt deg uɣerbaz.
Akken yebɣu yili lḥal, aselmed n tmaziɣt yeṭṭef ciṭ taqacuct deg uɣerbaz imi ɣer yiselmaden-is, mačči kan d tamsalt n uɣrum, tella deg-s temsalt n nnif akked tirrugza. Akka i aɣ-d-nnan kra deg-sen.
Hocine.Moula