Nassima Rabehi d yiwet gar tmedyazin neɣ timaruyin i yefkan ruḥ-is i tmedyazt n teqbaylit neɣ n tamaziɣt s umata.
D yiwet gar tidak i yesnarnan azal n tmedyazt n teqbaylit. Tefka azal d ameqqran i tmedyazt n teqbaylit taqburt, imi i d-tḥawec aṭas n yisefra n teqbaylit ɣer temɣarin. Tban-d aṭas ɣer unnar n tira deg useggas n 2014. Ass-a ,ɣur-s yiwen wammud n yisefra, d taḥawact seg timawit-nneɣ. Tlul ass n 15 deg yunyu 1967, deg Lezzayer tamanaɣt. Ma tura tezdeɣ deg At Lqern, i d-yezgan deg temnaḍt n Buzeggan, di tmurt n Leqbayel. D tamedyazt imi tebda tira n yisefra deg useggas n 1988, dɣa asefru amezwaru i tura, tsemma-as “Leḥmala”. Lḥasun d ddunit i tt-iseɣren imi d-teğğa aɣerbaz zik, bḥal akk tilawin n leqbayel. Seg temẓi-is, tḥemmel taɣuri, tamedyazt d tmussni. Xas akken tebda tira n tmedyazt deg useggas n 1988, maca teğğa-ten kan deg rrif, yuli-ten uɣebbar. Dɣa, tezwar deg usizreg n tmedyazt n temɣarin n temnaḍt n Buzeggan, teğğa tin-is d taneggarut. Ma d ayen yeԑnan tamentilt (sebba) i tt-yeğğan ad teḍfer abrid n tira n tmedyazt, ad naf d akken d iḥulfan-is d wayen akk tettidir deg tmetti-nneɣ. Am wakken, diɣen, tḥemmel ad d-tsel i temɣarin mi ara sefruyent, d yisefra i d-as-d-teqqar yemma-as. D tamarut imi tura, yakan, adlis-is amezwaru i d-yellan d ammud n yisefra s teqbaylit, tefka-as azwel “Ammud n tmedyazt n temnaḍt n Buzeggan”. Yeffeɣ-d deg taggara n useggas n 2014, ɣer tezrigt “El amel”. Llan deg-s 67 n yisefra n waṭas n temɣarin n temnaḍt-is yecban: yemma-s Zwina, Nna Werdiya n At Yeḥya, Nna Yamina n At Σebbas, Nna Seԑdiya n At ugujil, Nna Faḍma akked setti-s tameԑzuzt Izemraqen ( snat-a tineggura uwḍent leԑfu Rebbi) … Ma d isental iɣef i d-yewwi wammud-a n tmedyazt, mačči d yiwen neɣ sin, gar-asen: temẓi, tameṭṭut, lḥif, lɣerba, zwağ, zzher, lwaldin, tagrawla, amjahed…atg Massa Rabehi, la tettheggi aṭas n yidlisen, ara d-yeffɣen deg yiseggasen i d-teddun, gar-asen: ammud n yinzan, ammud n temseԑraq, tullis, ungal d tsuqqilt n tmacahut-nni “Le Petit chapeau rouge” s teqbaylit.
Adaoun Abdelghani.