Tameddit n wass n lḥed yezrin 24 yulyu 2016, tella-d tulya tunṣibt n tezrigt tis 13 n tfaska Ḥkku-d aẓuri “Raconte-arts”, s usentel "Ales-iyi-d Tagelda n Kuku " di taddert n Ṣwamaε lwilaya n Tizi Uzzu,
Anda iḥedren nnig n 250 n yinaẓuren i d-yussan si temnaḍin yemgaraden n tmurt n Lezzayer d wazal n 50 n yinaẓuren i d-yussan si tmura n lbarani, am Fransa, Tunes, Congo, Muritani, Lmaruk d waṭas-niḍen. D leqdic ara yeddun γef teγzi n 08 n wussan, alamma d 31 yulyu 2016. Tulya tunṣibt n tfaska-agi, tella-d deg ubraḥ n baylek n taddert n Ṣwama&epsilon,; anda imḍebren yellan γef lmendad n tfaska-agi fkkan-d kra n wawalen am Ḥassen Metref akked Denis Martinez, akken i d-meslayen kra n yimḍebren n tγiwanin am Ṣwama&epsilon,; illulen Umalu, inaẓuren, syin Mass Meẓyan Sadji aselway n tesqamut n taddart n Ṣwamaε iberraḥ-d s tulya tunṣibt n tfaska-agi. Si tama niḍen, Massa Ladeddou Taseεdit, tamγart tazemnit n taddart n Ṣwamaε i yesεan qrib 100 n yiseggasen, tella d lqibla i d-yefkan limara amenzu n beddu n leqdic n tẓuri. Deqs n twaculin d imezdaγ n tudrin n leqbayel i d-yussan, fursen tagniti ad gzin s yidelsan n tmura n lbarani. Si tama-nniḍen, inaẓuren n tmura n lbarani, snaεten-d idelsan-nsen, ugmen deg yidelsan-nneγ. Ahil i yettwajerden d amesbaγur, anda llant temsikniyin yemgaraden, isaragen, isura, ticeqqufin n umezgun, timucuha, tamedyazt, ccna, timliliyin…atg. Uraren deg yiberdan akked yizenqan. Iswi n tfaska-agi d asnerni d unegmu n yidles amaziɣ akked tefriqt s umata d wuẓẓu n tayri deg wulawen n yimdanen, asebγes n tẓuri i tudrin n leqbayel, aẓeṭṭa n tegmatt gar yigduden d usbeddi n tqentyar gar tmura n wagerakkal.
I usmekti, tafeska-agi, tsuddes-itt-id tdukla n tẓuri n sinima n Tizi Uzzu, s lemɛawna n Useqqamu aγerfan n ugerzu n Tizi-uzzu, imḍebren n tγiwant n Ṣwama&epsilon,; taseqqamut n taddart Ṣwamaε d tidukliwin tesεa, akked yimezdaγ n taddart-a.
Leqdic iteddu akken iwata lḥal imi gren irebbi i leqdic-agi γef teγzi n useggas-aya.
Islam Bessaci