Γas akka ttruḥun yimdanen, zerrin wussan d yiseggasen, maca win akken ijerden tudert-is s tikta, s lxedma d umennuɣ d awezɣi ad t-ttun medden.
D wigi dɣa iɣef i d-yenna Ccix Muḥen : «Yella lbaƐd yella, ulac-it, yella wayeḍ ulac-it, yella.» Mustapha Bacha, imi d wagi ara d-nemmekti ass-a n 08 di ɣuct, yettuneḥsab seg wid yellan ɣas ma ulac-it. Mmi-s n Tasaft Ugemmun, tin akken i d-yurwen izumal, yuɣ abrid n umennuɣ seg temẓi-s. Ama mi yella deg tesnawit neɣ deg tesdawit, yezga d amenzu s aseḥbiber ɣef yiseɣ d yidles-s yuɣalen di rrif lawan-nni. Ulamma qessiḥet teswiƐt, aseqqi yeḥma, maca win I zedɣent tissas d lmuḥal ad yebru I wawal neɣ ad yekbel tidet. Tiddi-s tuğew-as-d urrif d uɣilif imi yezga deg tlufa mgal sin n yixsimen: adabu d at tmira. Amennuɣ-is yessaweḍ-it ɣer leḥbus, maca ur yefcil ara mi akken yella seg yimenza I d-isbedden akabar aserti deg furar 1989. Yedda, yuzzel, iƐawez iwakken ad yeldi allen I waṭas n yilmeẓyen ladɣa di tesdawit iwakken ad d-iḥelli azal-is I yidles-is d tutlayt-is tamaziɣt. Mi akken yendeh rrebrab seg tama, amennuɣ ɣef usekcem n tmaziɣt s aɣerbaz azzayri, ul n Mustapha agrawliw yegguma ad yejmeƐ annect-nni n yiɣeblan anda mmezlen ula d yigerdan. D tin I dssebba n rwaḥ ! Yeɣli s ibeddi, uqbel ad yaweḍ lebɣi-s.
Ass-a s kra n win I t-yessnen, ẓran d acu I d azal-is deg unnar, ur yelli d win yeqqaren:”xedmet akka.” Yezga yeqqar:”ad nexdem akka” imi dima d netta I izeggiren. Cfawat I d-yeqqimen ass-a ɣet waṭas n win I t-yesnen d awal-nni iwumi I d-yettales:”Γret, ma tebɣam ad nesseɣs ayen akka I aɣ-yettwakksen.” ṭṭes di talwit !
Smail. M