Mbeɛd mi d-tella yiwet n tsuqqilt n tmendawt iɣef d-yella uƐiwed n tmuɣli deg yennayer yezrin, Asqamu Unnig n Timmuzɣa iger-d tiɣri deg yimas yezrin i kra n yimassanen iwakken ad ad sbedden yiwet n tesqamut ara d-yelhin s usuqqel n sin n yikaramen yettuneḥsaben d lsas deg umezruy n tmurt.
Wigi, yiwen d ulɣu n umenzu n wunbir 1954 yettwajerden deg Yiɣil Imula, wayeḍ d lemcawrat-nni iɣef ibedd Ugraw n Summam i d-yellan deg Yifri ass n 20 di ɣuct 1956. Deg temlilit-a ihi, Assad Si Lhachemi, s yisem-is d amaray amatu n HCA yenna:”ccɣel-a iɣer nekker ass-a ur yelli d ayen ixulfen ayen iɣef tettwabedd tmendawt n tmurt-nneɣ. Imi tura tutlayt-nneɣ tessaweḍ ad tili d tunsibt deg tmendawt, d lawan ihi ad ilin yiḍrisen igejdanen iɣef tettekka tmurt s yis-s. Ayen i aɣ-yefkan afud ass-a iwakken ad neddu ugar deg unnar d axeddim i d-ssewjaden yisdawanen n tmurt-nneɣ.”Mass Assad yesseḥres deg wawal-is ɣef wazal n tsuqqilt mi d-yenna dakken “aḥric-a yesƐa azal meqqren deg usnerni n tutlayt, ihi yuklal ass-a lwelha I usnerni-s. d acu kan, ilaq ad d-nini belli asileɣ n wid ara d-yelhin ye-s ilaq ad d-yili melba leƐḍil.”Amaray amatu n usqamu unnig n Timmuzɣa ixebber-d dakken axeddim-a d win ara d-iwejden uqbel asfugel s ugraw n Summam ara d-yili deg 20 ɣuct I d-iteddun. Imi di taggara n temlilit-a tella-d yakan yiwet n tɣuri tamenzut n wulɣu n umenzu n wunbir 1954. Seg tama-s, Hamid Grin, aneɣlaf n taywalt, yeḥḍer timlilit-a anda I d-yenna;”Tamaziɣt tuɣ amkan-is deg unnar n taywalt, ladɣa seg wasmi tuɣal d tunsibt deg tmendawt yettwabeddlen deg waggur n yennayer yezrin.”yenna daɣ uneɣlaf n taywalt belli “25 ar 30% n rradyuwat n tmurt-nneɣ sƐant ahilen s tmaziɣt.”
Smail. M