Deg tmurt i irebḥen, xemmen u xedmen amezgar i lmal i wakken ad yezger seg tama ɣer tayeḍ mebla teḍra-d twaɣit : ad zeggren yiɣersiwen-a seg talwit. Sɛan azref deg tudert am nutni am wiyaḍ. Awi-d kan ad neqqsent twaɣiyin u ad sseshilen tikli i lmal akked yimdanen deg yiberdan, ladɣa, wid-nni ileḥḥun s tkeryas. Ma deg tmurt-nneɣ, mačči ur ssishilen ara kra n yimdanen tikli i lmal, meɛna ttɛewwiqen ula d imdanen deg ubrid-nsen. Ladɣa, mi ara tili temsalt terza ṣsenf-agi n yimeɛḍar. Ayen yellan, yakan, d ttawil i izemren ad yessnefsusi tudert-nsen, ixus aṭas, meɛna ula d winna ttgen-as aɛewwiq. Acḥal n tikkal i nwala abrid-agi n yimeɛḍar ɣelqen-t medden s ṭunubil neɣ s wayen-nniḍen. Wagi mebla ma nemmeslay-d ɣef wameg gezzmen medden iberdan xas ulamma yella umezgar neɣ tiqenṭert. Acḥal n twaɣiyin i yeḍran ɣef ustehzi-a. Ar melmi ? Neɣ i wacuɣer akka ? Yelha limmer ad d-lhun yimussnawen deg unadi n uḥric-a. Ahat, deg usegzi n temsalt i tella tifrat ?
Hocine.M