Taɣiwant n Bechloul i ibeɛden s wazal n 20 n yikilumitren ɣef Tubiret tessewjad i ufraq n 50 n yixxamen n ṣṣenf “LPA” deg wussan-a i d-iteddun.
Ɣef leḥsab n yisallen i d-newwi sɣur yimḍebbren n tɣiwant, asenfar-a yebdan yakan azal n sin n yiseggasen yewweḍ ɣer taggara-s, yerna ixxamen wejden akken iwata imi skecmen-asen aman, trisiti d lgaz. Seg tama-s, imḍebber n usenfar-a yettukelfen s lebni d ufraq ijmeɛ-d wid yesfaydan s yixxamen-a iwakken ad yessenɛet i yal yiwen axxam-is. Iwakken ur d-yettili ara lxiq, yella-d ujbad n tesɣart, yal wa yusa-d anda i as-d-yefka zzehr-is. Seg tama nniḍen, nnan-aɣ-d yimḍebbren n tɣiwant dakken qqiment-d tḥuna mazal ur ttwaferqent ara, imi aselway n tɣiwant yugi ad yeqbel afraq mebla ma tesfayda-d tɣiwant s wazal n 14 n tḥuna. Rray-a ibeggen-it-id uselway imi akal ideg ttwabnan yixxamen-a d tikci i t-tefka tɣiwant I “l’agence foncière”. D acu kan, iwulem i tneggarut-a ad teǧǧ seg leḥq-is kra n 14 n tḥuna ara yettunefken i wid iwumi hudden asmi fkan akal i lebni n yixxamen-a.
Dima ɣef leḥsab n wayen i aɣ-d-nnan yimḍebbren n tɣiwant, afraq n tḥuna ad d-yili asmi ara d-tili tifrat i uɣbel-a icudden snat n tamiwin. Seg tama-nniḍen, yettunefk ad d-nini dakken ssuma n yixxamen-a d tin yellan ɣer tezmert n wid yesfaydan, imi nnig n lemɛawna i d-tefka ddula s wazal n 70 n yimelyunen i yal yiwen, win yewwin axxam fell-as ad yernu kan 150 n yimelyunen n ssantim. Tadrimt-a yezmer daɣ ad t-id yawi d areṭṭal seg lbanka i yessasehlen taluft i yimdanen.
Smail. M