Iḥemmel ccna segmi yella d amecṭuḥ. Ula d baba-s imir-nni yuɣ-as-d tagiṭart akken ad ternu tayri-s ɣer uẓawan aressi. Wagi d Fares Amaɛuc, acennay i d-ilulen, i d-yekkren di temdint n Bgayet, tamnaḍt n Ssuq n Letnin. Ilemẓi-a d yiwen seg gar wid iḍefren tizlit taqbaylit, yecna yis-s s zzux d ameqqran imi yezga dima yumer s lasel-is d tummast-is (identité). Amecwar-is deg wannar-a, ur ɣezzif aṭas. Yebda-t deg useggas n 2009, mazal yettkemmil-it s lebɣi-s i yesɛa i leqdic d usnulfu. Sa n yiseggasen i d-yelḥa ar tura s leɛtab d tmussni n wallaɣ, simmal tfetti daxel-is, trennu-as-d tirmit (expérience) I wakken ad yessemɣer aswir-is ugar. Fares, ur yeksib kan yiwen n uɣanib (style) deg ccna-s, imi yecna ɣef qeddac n yisental yemgradem, am tayri, ddunit, timetti…atg. Aya, ad t-naf deg ukuẓ (04) n yiseɣraz i d-yessufeɣ yakan, neɣ deg yimeslayen n tezlatin-is. Iseɣrez-is amezwaru, yeffeɣ-d deg 2009, d win umi isemma « Aṭṭan-iw d ssem. Yerna kraḍ n yiseggasen, yessufeɣ-d aḍebsi wis sin s uzwel « Lexyal ». Wis tlata yessufeɣ-it-id di 2013, isemma-yas « Tfukk leḥnana ». Ma d wis ukuẓ, ilindi kan i t-id-yessufeɣ, yefka-as azwel « Anef-iyi ». Yal iseɣrez yettawi ṭam (08) n tezlatin. Fares d win i d-yettheggin akka tura aḍebsi wis semmus, ur yettɛeṭṭil deg tuffɣa, ɛlaḥsab N wawal-is. Yettban mmi-s n Bgayet, tezdeɣ-it tehregt (inspiration) n lɛali, tin i t-yettɛawanen ad yaf tiktiwin, ad yaru, ad yessefru, ad yecnu yis-sent, daɣen, s taɣect-is tuzmirt i ila d afud. Iban imi ur yettɣimay aṭas n wakud war ma yessekles, yewwi-d imaynuten i d-yettnernayen wa deffir n wayeḍ. Ahat d abeḥri n yilel i yellan deg temnaḍt-is i d sser n wannect-nni, neɣ wissen d acu! Fares Amaɛuc, ssnen-t xilla n medden, yehwa-asen ccna-s daɣen. D annect-nni dɣa i t-yessawḍen ad iseɛɛu tinnubgiwin sɣur-sen, ad yettwaɛraḍ, ad yeg timeɣriwin d ttiɛadat n ccna ɣer wacḥal d adeg deg tmurt. Aya yumer yis-s, yerna-as-d tabɣest ad yessefreḥ kra wid i t-iḥemmlen, ad d-yefk ayen iwumi yezmer i tezlit-is taqbaylit. Yenna-d ɣef waya: «yessefk s nekk s wid akk icennun ad neqdec s wul d tayri ɣef tezlit-nneɣ, acku ssarameɣ s tidet ad teddu ɣer sdat, ad tawweḍ taqacuct». Afud ijehden i Fares Amaɛuc.
Kaïsa Khalifi.