Zik, di tudrin n Leqbayel, akken ad ǧǧen ad yeww lexrif i medden merra, ad ikkes bab n lexla, ad ikkes yigellil, ttarran yimsewqen n taddart lexḍa (lḥaq): ulac win ara d-yekksen lexrif alamma berḥen. Assen mi kksen lexḍa, ffɣen medden tanezzayt, ruḥen rzan ɣer tferkiwin-nsen, ad d-kksen lexrif. Yiwen n yigellil, ur isi ara taferka, ur as-d-yeǧǧi ara baba-s akal, iqqim di tejmat weḥd-s, lɣaci tteddin d tirebba, ulac win t-id-iluan, ulac win i as-yennan: ‘’yya ma ad teddudḍ ad d-tekkseḍ’’. Iqqim, dɣa yewwi-d asefru : ‘’Ass lexmis taṣebḥit Nebhen imsewqen-is Ad kksen lexḍa Albaḍ iruḥ a lmelk-is, Netta d zwaǧ-is Ɣer-sen amzun d lficṭa Baba tebra tmeṭṭut-is Ad truḥ seg yiri-s Immut ur d-iǧǧi ara’’.
Ramdane LASHEB