D asali ara yesferḥen iselmaden akked yinelmaden n Ugezdu n Tutlayt d Yidles n Tamaiɣt n tesdawit n Tizi Uzzu imi agezdu-agi ur inuqel ara ɣer Tamda.
Ihi, inelmaden akked yiselmaden n tmaziɣt, uɣalen ass-a ɣer tesdawit n Tizi Uzzu mačči ɣer Tamda. Deg tazwara, imḍebbren yellan deg tesdawit-a, gemmnen ad naqlen Agezdu n Tutlayt d Yidles n Tmaziɣt ɣer Tamda imi, ɣef wakken i d-nnan, teččur tesdawit Mmulud Mɛemmri dagi deg Hasnawa. Ayen yeǧǧan imḍebber n lweqt-nni Mass Arezki Derridj i wakken ad inaqel Agezdu-agi n tmaziɣt ɣer Tamda.n Acu kan, kkren-d yiselmaden akked yinelmaden mgal rray-a u gemmnen ad ḥebsen ɣef lxedma akked leqraya, deg tazwara n tuɣalin ɣer tesdawit, ma yella inuqel ugezdu-a ɣer Tamda. Acu kan, tuɣalin n Mass Tessa Ahmed ɣer uqerru n tesdawit (i kra n lweqt kan), yegla-d s umaynut u yebda iferru uguren yellan ama d wid n yiselmaden neɣ wid n yinelmaden. Gar wuguren i d-yufan tifrat, yella wagi n Ugezdu n Tutlayt d Yidles n Tamaziɣt. akka i tt-fran d rray i wakken ad yeqqim deg Hasnawa deg temdint n Tizi Uzzu. I usmekti, tasdawit n Tizi Uzzu, ha-t-an la d-tettheggi matawayen gar-as akked kra n tkebbaniyin, yecban Ansej, Anem d Cnas i wakken ad walin u ad mmeyzen amek ara ilin wassaɣen gar-asen. Assaɣen ara yessiwḍen ahat inelmaden ɣer uxeddim ɣer tkubbniyin asmi ara selken leqraya-nsen, ‘’d aheggi ɣer umahil sya d afella’’, ɣef wakken i d-nnan yimḍebbren n tkebbaniyin-a.
H. Moula