Imɣaren-nneɣ d agerruj, d wid iɛzizen ɣef wul. Zgan kerhen lɛuj, bɣan sswab d lmeɛqul. D imɣaren-nneɣ i aɣ-yesserwan awessi, sskaneyen-aɣ-d abrid n tafat. Ma yella nefka-asen asteqsi, tiririt ad tt-id-rren d snat. Imaɣren-nneɣ, nḥemmel-iten swan, azal i lan yif ssuma. Acek-iten zeddigen am waman, d rrbeḥ kan i asen-nsemma. D imɣaren-nneɣ i aɣ-yesseḥfaḍen tissas, ur aɣ-ǧǧan ad necceḍ. Ssnen ad ḥudden llsas, ɣur-sen war ccek ad teɣreḍ. Imaɣaren-nneɣ, banen d anwi, awal i ten-yeɛnan ɣezzif. Win ur ten-ixaleḍ fell-as terwi, netta d ubuhal kif-kif. D imɣaren-nneɣ i yuklalen annuz, ugar n wiyaḍ imeẓyanen. Ɣas dima ad asen-neqqar ayyuz, aṭas i mazal ttalasen. Imɣaren-nneɣ, acḥal i ten-nettɛizzi, abaɣur seg-sen yettwaway. Imi-nsen ineṭṭeq-d s yinzi, iḥekku-d daɣen timuɛay. Imɣaren-nneɣ, lhan i temwinsa, rnan ttcebbiḥen tawacult. Yal mi ara d-inin taɣawsa, nettyeqqen belli d tameẓẓult. D imɣaren-nneɣ i d At tfenṭaẓit, ggullen ad tt-ḥerzen ur as-berrun. Nnif ssekcamen-t i ugrud d tlemẓit, widak-nniḍen ur ten-tettun. Imɣaren-nneɣ, tekksen-aɣ tatut, smektayen-d amezruy d yidles. Ansay i neṭṭafar am lqut, yis-sen d awezɣi ad t-neɛfes. D imɣaren-nneɣ i d azamul n tmussni, nennum sɣur-sen nlemmed. Amek ara aɣ-seɛyyun ɛni, yak i tama-nsen i nsenned. Imɣaren-nneɣ, cfan-d ɣef zik, tudert-nni n yimezwura. Ulama yid-sen ur tt-necrik, s usugen deg-s negra. D imɣaren-nneɣ i ɛuffen tiḥsifin, ssaramen ḥaca lxir d lɛali. Tiẓeḍt deg ccwal ur tt-ufin, ran tagmat ad tidir ad tili. Nnig wayen i d-iniɣ merra ɣef yimɣaren-nneɣ, mazal ameslay fell-asen ur ifukk. Imi ɣas ma d imeqqranen deg leɛmer, maca allaɣ i kesben s tmussniwin d tektiwin yeɛmer. Nerra tamawt ula i leqdic-nsen deg yal tama. Amedya, llan yimɣaren i d-yesnulfayen tiddukkliwin, ttmaggan d iselwayen-nsent, ttazzalen ɛettben I wakken ad yesmurres ccɣel-nsen. Rnu, neẓra belli ɣas ad d-ssekren tarwa ad mɣuren, wanag ttekkayen s tezmert-nsen deg urebbi n yiḥfiden-nsen d llhu yis-sen. Ad ken-yeḥrez Uxellaq ay imɣaren d temɣarin-nneɣ.
Kaïsa Khalifi