Ad ɛerḍeɣ kan ad d-awiɣ amgarad yellan gar tmeɣra n uqcic akked teqcict, deg waḥric-agi wis sin, acku mačči deg waṭas ideg i mgaraden.
Ayen akk i ten-icerken uriɣt-id yakan deg uḥric amenzu ( tameɣra n uqcic). Taqcict, ilaq ad ttɛeggnen uxxam n uqcic, aɛeggen amezwaru yettili-d s wawal. Ma yella fran awal dayen, taqcict dayen d tislit-nsen. Ass amenzu, ad ruḥen kan imawlan n uqcic s axxam n teqcict ad ssutren ma ad asen-fken taqcict-nsen i mmi-tsen. Zik-nni llan imawlan yettɛegginen tullas i warraw-nsen asmi akken ara d-tlal. Zik d lɛib ad ruḥen uxxam n yisli ad ssutren taqcict tamecṭuḥt ma yella ur tezwiǧ ara uletma-s tmeqrant.
Aqcic ur iẓer ara taqcict alamma d ass n tiddin. Taqcict ma yella yefka-tt baba-s, ur tezmir ara ad tini «ala». Tameɣra n teqcict xeddmen-tt ɣef sin wussan. Tura yiwen wass kan. Uqbel tameɣra, imawlan n teqcict ad necden wid-n i asen-yettilin, tiwelliyin, imdukal…
1.Ass amenzu
Axxam n teqcict, ad rjun ad ɣren lfatiḥa, ula d nutni ad awin wid ara iḥedṛen, imeqranen-nsen. Ad heggin imekli i wid ara yeɣren lfattiḥa. Ccix ad yeɣɣer lfattiḥa, mi yekfa, baba-s (Yezmer ad yili d ɛemmi-s, xali-s d gma-s ameqran) n uqcic ad yessuter taqcict i baba-s, ad as-yini :«ad ṣelliɣ fell-ak a nbi, usiɣ-k-id i nnesba, ad iyi-tefkeḍ yelli-k fantiyya (Ad yebder isem n teqcict) i mmi leflani (Ad yebder daɣen isem n uqcic).» Ad as-d-yales i tefyirt-agi kraḍ (3) n tikkal. Baba-s n teqcict ad as-d-yerr : «ad ṣelliɣ fell-ak a nbi, ma yefka-ak-awen-tt Rebbi d nbi, fkiɣ-awen yelli fantiyya i mmi-twen leflani .» Ad as-d-yales i tefyirt-agi kraḍ (3) n tikkal daɣen. Imir kan baba-s n teqcict, ad yessers idrimen n taɛmamt ( d idrimen) ɣef ṭṭabla, baba-s n teqcict ad yeddem ayen yebɣa (baba-s n teqcict ur yettadam ara aṭas, azal n 500 neɣ 1000 idinaren). Mi kkfan, ad ččen imekli. Tameddit, axxam n teqcict ad heggi imensi, ad seččen adrum. Axxam n teqcict, xeddmen kan yiwen n yimensi i udrum. Mi yekfa imensi, taqcict ad as-qqnen lḥenni ula i nettat, dacu kan d At uxxam akked yimeɛraḍ kan i yettilin. Srusuyen-d lmetred, ssaɣayen ticemmaɛin, ttaken-as lxir ula i nettat. Mi tekfa, imawlan-is ad ruḥen ad ḥedren i lḥenni n uqcic, ad nezzhen, ad ceḍḥen deg wurar.
2.Ass wis sin :
Azekka-nni, ad yili imekli n yiqeffafen. Ad heggint taqcict, ad as-selsent timeḥremt tazewwaɣt, ad ɣummen yis-s udem-is. Ad as-d-rnunt abernus neɣ aḥayek s ufella. Ad as-xedment akerzi s ufella uqerruy-is s yis-s ara sdaklen timeḥremt-nni akked uḥayek. Ad as-qnent lfeṭṭa (Imeqyasen, afuc, tafzimt, tixutam…). Ad terju ar teddu, ad d-ruḥen ad tt-awin.
Fahim Messaoudène et Lilia Ouchène